【成功路】邨校插班喇沙級二變尾二 Patrick Sir3倍時間讀書從公屋跳入豪宅

育兒經 14:27 2023/02/14

分享:

分享:

Patrick Sir小一至小三讀邨校,小四插班入喇沙,他由全級第二跌到全級尾二,用一年時間花3倍溫習時間,成功追返入精英班,勁!

來自貧困家庭的Patrick Sir(林溥來),自小知道「知識改變命運」,脫貧要靠發奮讀書。童年時一家六口居住橫頭磡200呎公屋,幼小讀屋邨學校聖博德,全級考第二,後來被神父撰寫推薦信,成功考入喇沙小學,插班讀四年班,由天堂跌落地獄,為追成績,他用3倍時間溫習,一年內由輔導班躍升精英班。

Patrick Sir捱出頭來,他除了在幕前主持及演出外,更開辦教育中心、私立幼稚園,瓣數多多,收入更多,2019年斥資3千萬購入大圍3千呎豪宅,苦盡甘來!

最新影片推介:

Patrick Sir曾在節目《開卷》分享好書《請照顧我媽媽》,書中的故事觸動了他的淚線,令他憶起昔日媽媽為照顧4兄弟,放棄了一切,

我媽媽仲健在還很健康,成日幫忙看顧BB,我同媽媽感情很好,父母搵錢好艱難,媽媽在一間狹窄嘅小屋照顧我哋四兄弟,亦都打理得井井有條,又睇到父母為咗家庭放棄好多,冇娛樂慳使費,我媽經常講,我哋幾兄弟出世,多年來都未入過戲院睇一場戲!。

自小有生意頭腦

看到父母賺錢辛苦,Patrick Sir發奮讀書,希望知識改變命運,想早日脫貧,並會留意周遭的事,發掘商機,

我細個都想脫貧,咁多人住喺比較細嘅公屋,環境唔係咁好,要脫貧唔容易,所以細細個成日都會諗方法,諗將來大個咗點樣做,或者會睇多啲周邊發生嘅事,『原來呢啲搵到錢㗎喎!』我由細到大都慣咗呢個模式,我去邊、接觸乜嘢,都會諗吓人哋個運作係點,點樣可以做好啲搵更多嘅錢!我發覺我見乜嘢都係見到一盤生意,個腦就喺度諗!

Patick Sir稱,爸爸教得很好,會為他們製造良好的讀書環境,他與兩個哥哥讀書叻,二哥畢業後當了醫生,他則從事教育工作,

爸爸好用心去製造一個讀書環境俾我哋,爸爸係知識份子,佢唔能夠變得有錢係際遇問題,我眼中佢好叻,識好多嘢,如果有睇一本書《富爸爸‧窮爸爸》,佢當裡面嘅窮爸爸,都唔係唔叻㗎!教授嚟添…不過同變有錢係兩件事。

林父灌輸四書五經

林父會為兒子訂立時間表,食完飯休息一會就熄電視,一齊睇書、做功課,更經常跟兒子分享知識,

爸爸嗌我BB,『BB過嚟,坐我隔離…』就會講佢自己睇咗嘅嘢,佢唔理我哋幾大,可能我只係小學,但佢同我講易經、論語、聖經,講好多嘢俾我聽,我覺得其實我入咗好多嘢,當時明唔明都好,依家諗返好有用。

    點擊圖片放大
    +5
    +4

從邨校走到喇沙的辛酸

從屋邨學校走到傳統名校喇沙,Patrick Sir的求學時期比一般人辛苦,為了追上同學的水平,他花3倍時間用功溫習,

我讀聖博德幼稚園,喺橫頭磡,即是依家嘅樂富,我哋就喺嗰度住,我哋落樓下就係幼稚園,讀完之後就上附屬小學,就係聖博德小學,我哋幾兄弟都喺度讀,我一至三年班嘅成績都唔錯,全級考第二,我爸識一位神父,佢就幫我哋寫信,我就嘗試去考插班。

Patrick Sir在小學三年班的暑假去了喇沙考試,至今仍歷歷在目,清楚記得考試情況,

帶我去考試嗰位馮校長,好respectable嘅校長,仲記得馮校長帶我入去校長室附近考,行嗰條路好靜,自己喺度做卷,俾我考到喎!我4年班就入咗喇沙小學。

兩間不同的小學,水平有很大的距離,Patrick Sir入讀喇沙後即受到打擊,

我一入去都有啲打擊,我由全級第二變全級尾二,天堂跌到落地獄…我用咗大約1年時間去追,我唔係唔識讀書唔勤力,係因為個水平唔同,喇沙用好多英文,我哋屋邨學校,英文水平一定無咁好,但唔代表我嘅邏輯,我學嘢唔識,所以我入到去最辛苦係英文。

獲老師鼓勵再發奮

當年英文水平不太好的Patrick Sir,慶幸獲一位老師鼓勵,贈予一些方法令他成功急起直追,

佢知道我插班入嚟,亦知我以前考全級第二,我仲好記得佢講嘅肺腑之言,『你好叻入嚟,點解嚟到咁渣!』我就講俾佢聽英文嘅問題,佢就好好,俾啲方法我,同教我點樣去追,我有時去學校講talk都會分享,就係你要追,如果你靠勤力,嗰個勤力係點勤力呢?依家名校嘅學生唔會唔勤力,但人哋已經喺呢個高位,我喺呢個低位,大家一齊勤力,人哋一倍,我要三倍先追到,同埋我邊有咁多時間呢?我就化做習慣喇!當一啲嘢化咗做習慣,你就唔辛苦,咁我做咗都唔覺。

久而久之,Patrick Sir用了好多方法去應付英文,尤其是好深的英文默書,

以前用walkman錄音,自己錄完play俾自己聽,自己幫自己默,我媽唔識英文,佢唔可以好似其他家長咁幫個仔默書,要用好多方法同付出先有成效㗎!我4年班編咗去喇沙嘅輔導班,即係全級裡面偏渣嘅,但五年班我已經入到精英班。

問到Patrick Sir當年讀小學時有否補習?他提高聲調說:「補習?我窮到燶呀!我幫人補習賺錢呀,我好早就出嚟補習,就係為咗賺錢。」

林父英文好叻,但日日返工,只有間中在家才能指點一下,

我哋要靠自己,學校都有教,要自己記實,講真嗰句,學生想叻,最緊要『你上堂專心得㗎喇!』我由細到大都有一個理念,因為我想玩唔鍾意拖,最好快啲做晒功課可以早啲玩,有好多人上堂唔專心,放學要補習,咁不如我上堂好專心,快啲學識,快啲做好功課,我就可以好早去玩,所以以前我哋成日出去打波,我爸好鼓勵我哋運動,四兄弟成日去附近嘅聯合道公園打籃球,我發覺做嘢係要有效率嘅。

喇沙令他大開眼界

入到喇沙令Patrick Sir大開眼界,見識不少,他更笑自己是「大鄉里」,

我係入到喇沙小學,先知道呢個世界有工人姐姐,哈哈!我直頭未見過,真係大開眼界,咩叫旅行、搭飛機,全部都冇試過,有朋友仔請我去佢屋企嘅生日party,我仲記得上到去,嘩!間屋可以咁大㗎!張枱咁靚嘅,我嗰時真係大鄉里。

雖然與同學天壤之別,但樂觀的Patrick Sir沒有因自己家貧而不開心,

心理上人哋著NIKE我著白飯魚,其實你想像一個原始人,你俾一對名牌Nike同白飯魚,佢都唔知㗎!佢都唔知個分別,兩對都係鞋,其實細路仔好純真,當然潛移默化下,同學仔好多童言無忌,『我呢對名牌嚟,幾多錢呀!』你會開始知道名牌,我都有牌子㗎!我仲記得叫帆船牌,好出名出白飯魚,踢波好好踢,渣啲咪渣啲囉!個鞋底冇air,人哋有air係防震,我冇air咪冇air…

同學著Nike,Patrick Sir著白飯魚,但他竟自得其樂,將它變成獨一無二的波鞋,

我仲創咗用水筆畫白飯魚,幫自己畫個勾㗎!後尾仲成為焦點,『啲人話好正!』你夠唔夠膽畫自己對鞋吖!名牌佢又唔夠膽畫,我就任畫,哈哈…

Patrick Sir知道家裡的經濟狀況,不會因為「人有我有」,要求父母給他買Nike,

我好細個已經清醒,知道窮,知道冇㗎喇!唔會去要求,我諗我唯一有要求,就係想去文具店,我仲記得細個有個口頭禪,我幼稚園、小一,我爸都會定時帶我哋去文具店,問我哋想買啲咩?我會周圍望,口頭禪就係『想買啲嘢!我要買啲嘢!』其實就係唔知買乜嘢,所以我嗰時買得最多就係本畫簿,嗰本畫簿好勁,出咗好多年,我覺得好正,好大版,可以畫嘢。

    點擊圖片放大
    +4
    +3

中三補習開始儲第一桶金

Patrick Sir就讀中三便開始替鄰居補習,慢慢儲起第一桶金,

儲錢開補習社,我畢咗業都冇打過工,我一路keep住補習,我差唔多冇停過,由中三到大學都上門幫人補習,我去到大學就好變態,癲咗…一日補幾個,嗰啲錢除咗幫自己生活,阿爸阿媽俾得唔多零用錢,靠補習support住自己,第一桶金我唔係好記得幾時,之後我喺喇沙利道租咗個大約百零呎嘅細房,係一個住宅舊樓單位,開始做我嘅教育中心,淨係幫返我啲喇沙師弟補習,改個名叫「La Salle Workshop」,上門補習嗰啲學生,我叫佢落嚟,由嗰時開始會儲錢同投資。

投資有道

Patrick Sir首樣投資是教育中心,賺到錢就買股票同基金,初初接觸難免有損手,

全部輸嘅都一定係人哋介紹你買嗰啲,永遠都係,自己做研究嗰啲全部都幾ok,我都有啲眼光,因為我幾細心睇,但人有時會有個貪念,個貪念就係睇住自己嗰啲增長,但有人俾個number你,話俾你聽我識嗰個老細,話呢隻嘢遲啲會升…,我會憧憬,正喎!有機會喎!好似話一收購,5倍10倍,嗰啲變晒仙股,我都仲未賣,後期我就真係靠自己好認真咁長線投資,投資落自己生意,投資俾自己,我覺得投資俾自己好緊要。

賺到錢後,Patrick Sir開始投資物業,細屋搬大屋,2019年更一擲3千萬購入大圍3千呎豪宅,屋內設有一個無敵圖書閣, 

人要向上望,我唔係特登要搬大屋,適合就ok,好多人見到我屋企個超大圖書閣,其實我攞嚟自肥嘅,完全同我仔冇關,因為裝修完之後個仔都未出世,我哋搬入去新屋時,唔expect有Preemo(林若嘉),裝修好晒,拆晒啲房,我哋幾乎冇房,諗住兩個好正,跟住就有咗,因為我好多書,我由細到大都好想屋企有個好靚嘅書櫃,難得搬屋,真係想自我感覺良好,好開心,我好鍾意嗰度。

    點擊圖片放大
    +11
    +10

培養兒子閱讀習慣

Patrick Sir愛閱讀的習慣,遺傳了1歲多的兒子,他又大讚太太關宛珊教得好,

其實呢個真係潛移默化,媽媽又教得好啦!小朋友鍾意睇書,你一定要有啲方法,要好多方面配合,第一;佢眼見好多書,第二;佢眼見家長會睇書,你有冇留意家長想小朋友睇書,自己係唔睇書,我想講呢個係重點,細路仔有句叫「monkey see monkey do」,馬騮見到乜,見到先會做,我都見唔到你做,但你又叫我做,第三;就係佢睇書,你唔可以話『你睇啦!』開頭你一定要陪佢睇,要變成睇書係幾好玩,所以呢樣媽媽做得好,小朋友求其篤一本,都會坐低好認真同佢去講解,個小朋友聽兩句走咗去都唔會心急,等佢捉返過嚟又講過,做父母呢方面一定要put effort…

Patrick Sir投身教育工作多年,太太很放心將兒子學習路上全權交給他,

我老婆同一般媽媽分別好大,佢乜都冇理,因為佢交晒俾我,揀學校全部唔理,對我嚟講,我唔係睇重得咁緊要,我自己做教育,嚴格嚟講教好一個小朋友嘅方法係小朋友唔返學都學到嘢,阿爸阿媽識教,或者阿爸阿媽識教到佢點去學嘢,如果一個人係識自己搵知識學,使乜去邊到學啫!學校其實做乜呢,學校當然學到嘢啦!學校建立群體生活,同人相處溝通技巧,社交,享受校園生活,喺我眼中學校係咁嘅媒介,你唔係入到名校一定會變叻仔,名校都好多讀唔成書,可能佢唔識學習呢,學校係製造一個環境俾佢好似一個小社會咁,開始接觸人,接觸老師,學識乜嘢叫尊重,學識乜嘢叫知識、溝通…

Patrick Sir是國際幼稚園Galilee International School的創辦人兼總校監,21個月大的Preemo,也打算在此上playgroup,而兒子的小學及中學則寄望可以跟他一樣入讀喇沙,「我內心有一定嘅情意結」,不過他強調要因材施教,最終都要看兒子性格而定。

    點擊圖片放大
    +10
    +9

hket App儲積分換獎賞︰https://bit.ly/3ClEy1R

【名師試題教室】睇片連工作紙  中英數必學單元︰https://bit.ly/3sEeM3Q

hket App已全面升級,TOPick為大家推出一系列親子、健康、娛樂、港聞及休閒生活資訊及Video。立即下載︰https://bit.ly/34FTtW9

TOPick推出「Band1學堂」,更多教育升學資訊︰https://bit.ly/3a6HT6T

記者︰林碧洋

場地提供:Mini Hotel @中環