【生死教育】70歲開始—快樂時要快樂 曾智華:咪咁老襯只攬住堆錢瓜柴
發布時間: 2023/06/26 18:50
最後更新: 2023/06/26 18:52
▲ 七十歲開始—快樂時要快樂。
愈來愈近七十歲,愈來愈多人問我肥碌七十開始想做乜?
計一計,正常人八十歲已「好老」,可能唔多郁到,百病纏身,想四圍去都唔掂。
咁,先計劃七十歲到七十五歲先。
小弟素喜與老友大吃大喝大噴口水。咁,就要爭取未來五年盡做!若能繼續就最好,未能也無憾,因做咗。
自己素來覺得「人在天堂、錢在銀行」實屬戇居,故此,應該只留下足夠又安全度餘生的費用。然後,就快快樂樂地花花花。其中肯定快樂,為宴請各路有感情親朋晚飯。
年初已向中學老友公布,以後每年年初,請大家吃一頓,齊賀生日(因有一半最好感情的,皆在一月生日,包括我也是)。
另外,撥出5萬至10萬元由年初食到年尾,每月請一至兩餐。
如此,五年下來是30萬至50萬元,屬個人順意花費能力的「射程範圍」。
若七十五歲以後仍郁得食得,就再計劃請多五年,加碼到每年50萬至70萬元!
換句話說,預計未來十年,預算請最愛的朋友食80萬至100萬元的晚餐。
聽,好似好多,但老老實實,就我肥碌看看身邊人,咁上下年紀的,走吓一個,走吓又一個,相信能「捱」到八十歲的,可能只有五六成。
錢係賺嚟使的,成世人辛辛苦苦儲下的財富,當然應該在離開前快快樂樂地去花。
千祈咪咁老襯只攬住堆錢瓜柴,又或死前剩下大堆蝕到喊的「金融產品」。總之,七十歲開始—快樂時要快樂。
HKET App已全面升級,TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m
【ET Club會員積分獎賞計劃】用App換獎賞︰https://onelink.to/keyuqm
撰文 : 曾智華