【大象的告別式】強尼+Frankie談幻想中的喪禮 分享人生中最難忘的告別

娛樂 14:00 2023/08/11

分享:

分享:

「ViuTV一哥」強尼(許博文)與MIRROR成員「皮皮」Frankie(陳瑞輝)一同受訪。

如果有一日要離開人世,你會想以甚麼方法跟親友告別?一生中有沒有甚麼事令你留下遺憾?

「ViuTV一哥」強尼(許博文)、MIRROR成員「皮皮」Frankie(陳瑞輝)、黃靖程和馮志佑即將於9月一同合演舞台劇《大象的告別式》,強尼和Frankie跟TOPick分享首次合作的感受,又談到人生中最難忘的一次告別。

【大象的告別式】《我們的青春日誌》陳恩碩新作 Frankie首演舞台劇與強尼拍檔

點擊圖片放大
+5
+4

最難忘的告別

人生中總會遇上很多離別的時候,Frankie分享:「最難忘嘅一次告別應該係中二時同我爸爸告別。嗰陣爸爸有病唔舒服離開咗,嗰個告別暫時都係一生中最清楚同最大感覺嘅一次。」

他感慨道:「嗰個告別會有時限,你會有啲嘢講唔到出口,而你之後先會發覺點解我唔講多啲,會係一個遺憾。」
問到有沒有說話想跟爸爸說?他坦言:「都有好多好多說話。多謝!多謝所有嘅嘢。多謝所有你(爸爸)為我付出嘅嘢。」

強尼最難忘的一次告別發生於大學生涯中:「我讀建築,班上好少女同學,40個人可能得3、4個女同學。好記得有個女同學細我哋一兩年,雖然我哋成班麻甩仔都口多多,都當佢妹咁。」

【ViuTV一哥】50歲強尼《總有一瓣》首當劇集男一 棄當工程師賣樓入行獲太太支持

點擊圖片放大
+6
+5

原來新學年開學約一個月,該名女同學亦未有上學,強尼謂:「覺得唔係咁普通,先知道佢患有Cancer。佢係一個運動健將係校隊,運動好勁,又係教徒,好乖。」

強尼與一班同學相約那名女同學在商場吃午飯,「我仲記得喺邊!佢戴住頂帽,因為有做Treatment,出嚟對住我哋係嘻嘻哈哈咁笑,好似平日咁,但我哋嗰班平時口衰衰嘅人做唔返平日咁。」

眾人其後到機舖打機,「以前都唔會一齊打機,但你Feel到佢可能會走,要爭取時間同佢共處。佢用一個最開心嘅形象同回憶留畀呢班同學。」

女同學於大約半年後離世,強尼感慨道:「原來可以就咁就走咗。咁樣形式嘅告別我人生只係試過一次,佢出嚟係顧大家嘅感受,可能佢最清楚自己係咩狀況。」

(陳慧安 攝)

自己的喪禮

總有一天,人需要離開人世。問到想以甚麼形式跟親友道別?

強尼憶起數年前參加ViuTV攝影師泰哥的喪禮,「當日嘅氣氛我印象好深刻,好輕鬆,佢屋企人叫我出去分享,嗰個喪禮令我有新嘅睇法。原來佢喺在世時,屋企人唔知道佢工作時係點,係靠喪禮嘅人講。」

他因此受啟發:「之後我突然同我老婆講,如果第時我死咗,唔好諗住簡單(處理),要搞個喪禮,叫我啲朋友嚟,開心咁講返我以前嘅嘢。」

他覺得:「我個仔永遠唔會知佢老豆做嘢係點,希望有人話畀佢聽佢老豆做嘢係點、朋友眼中係點、細個係點,等佢知道晒成個故仔。」

(陳慧安 攝)

強尼感慨指:「以前會覺得喪禮只係一個模式,但原來個意義對好多人嚟講係應該有咁嘅意思。我將來離開希望可以有個地方講返可能連我自己都唔記得、對嗰個人係重要嘅說話,我理想中嘅喪禮希望係咁。我唔喺度都好,我確實存在過,有啲事、說話,就畀其他人知道。」

Frankie坦言:「其實我冇咩諗過如果我呢刻唔喺度會有咩留低畀𠵱家嘅人。聽完強尼咁講,我仲未諗到有咩可以完整過呢樣嘢。大家工作或對屋企人、朋友......就算朋友都有幾堆,會有唔同嘅面向。如果照呢個模式去做,係可以令所有人都知道唔喺度嘅人嘅完整係點。」

強尼補充:「個完整真係要靠其他人去砌返,冇一個人可以見過呢個面向。嗰個告別好有意思。」

(陳慧安 攝)

最想念的人和事

人一生中會遇上很多過客,同時亦會遇上對自己很重要的人。

談到最想念的人,Frankie說:「最掛住嘅人,我諗咗幾個都係屋企人。」

強尼則謂:「我未必諗到最,但會有好多畫面飄出嚟。我由細到大同阿爺阿嫲住,喺我讀書同出嚟做嘢先後離開咗,我會記得佢哋。呢一刻喺你腦海Pop-up出嚟嘅人都會掛住。我覺得人永遠都重要過事。」

Frankie認為:「通常唔係一件事,係一個情境,係一個Mood。」

最想念的事通常都涉及最想念的人。

點擊圖片放大
+5
+4

有遺憾才完美

人難免會遇到大大小小的遺憾,問到會如何處理?

強尼指:「可能我𠵱家嘅生活都有好多遺憾不斷發生緊,有時明明覺得呢段關係唔係咁處理係會好啲,但人就係咁,會『Kick』嘅。Frankie認同道:「係一定『Kick』。做唔出就冇㗎喇。」強尼覺得有時明知道是遺憾卻沒法改變,「個心會諗可否做多啲嘢,但好似做唔到。」

最新影片推介:COLLAR專訪

Frankie比較樂觀:「我覺得方法總比問題多。睇下你點樣去處理個遺憾就最緊要。」強尼謂:「人慢慢活得耐,要學識接受遺憾,一定有嘅。我會嘗試去接受嗰樣嘢喺我生命出現,人人都希望自己嘅生命係完美無暇。」Frankie認為:「無可能嘅。」

強尼續說:「有遺憾已經係完美啦。你知道係無可能,咁咪去接受。呢個Moment你知繼續唔到,放低佢先,可能3年後我哋又可以合作呢。」Frankie有感而發:「我覺得人總要向前看。無謂糾結於一啲以前嘅嘢,不如放心衝去前面,可能衝衝下會發覺有啲以前帶落嚟嘅幫助可以幫到你。」

點擊圖片放大
+6
+5

強尼與Frankie的第一次

強尼於《大象的告別式》內飾演Dr Cheung,他透露角色跟每個人都有關連,「佢主要幫佢哋幾個人搵嘢,我幫佢哋之後我點呢?可能我都有一啲嘢需要搵,係一個關於搵嘢嘅過程。」

他繼續大賣關子,「每個人包括你都會,生活耐咗總會有一、兩忽屬於你嘅嘢唔見咗,令你冇咁完整。有返嗰兩忽嘢個人個心就會「霞」(暢順),舒暢啲。我終於搵返佢喇!」

Frankie則飾演陳朗,「佢係一個比較多嘢要搵嘅人。佢有個特質,做好多決定嗰陣都係優柔寡斷,有時佢做完決定之後就發覺另一樣嘢就冇咗喇。」

點擊圖片放大
+12
+11

強尼和Frankie相識了6年,今次為二人首度合作,他們不約而同地表示很期待跟對方一起演戲。

Frankie指:「之前見強尼都係《全民造星》,其實大家都唔係唔熟,只係冇一個機會將大家嘅嘢混合。」強尼認為:「喺一個我哋相對最唔熟悉嘅範疇合作,對我哋兩個嚟講好似一齊去探險嘅感覺。做音樂劇就好似兩個人攞住支電筒去探險。」Frankie說:「一齊成長啦。」

強尼大讚Frankie:「佢之前講過對唱歌未係好有信心,嗰日一試Key,佢一開口,好Firm!一去首歌就好肯定。

Frankie亦覺得自己自信增加了,他亦大讚強尼:「《造星》時私底下(同強尼)好多溝通,知道強尼係一個好鍾意搞笑嘅人,喺電視機睇到強尼唱歌,同真實睇到強尼唱歌係兩個感覺嚟㗎。睇強尼多咗好多色彩,唔同咗。」強尼笑言:「獲得了MIRROR認證。」

(陳慧安 攝)

遺憾的美學

Frankie沒預期觀眾會有甚麼收獲,「一個咁有意思嘅劇本,我淨係想觀眾感受到我哋講嘅一個遺憾嘅美學。」

強尼說:「因為遺憾大部分人都覺得係Negative,但係其中一句對白『其實有遺憾都可以係幸福嘅事』。入去睇完再細味下。點解遺憾都可以係幸福呢?如果你唔Care嗰樣嘢就唔係遺憾啦。證明你Care嘅嘢喺你生命中都出現過,都係好嘢。」

相信觀眾都很期待看到強尼和Frankie的第一次!

化妝:Yuki Pan@yukimakeup(強尼)、Mayling Suen @Annie G. Chan Makeup Centre(Frankie@Mirror)、KyoLee@K_y_o_mua(大會)

髮型:Mavis Mar@mavis.m_hair(強尼)、Seiko Sin@HairCulture(Frankie@Mirror)、KyoLee@K_y_o_mua(大會)

造型:PIPA Creative(Frankie@Mirror)

服裝:I.T, Both(Frankie@Mirror)

記者:梁樂欣

精彩獎賞活動等您發掘:https://bit.ly/3ClEy1R