【網絡熱話】黃大仙酒樓職員疑落錯單　$698變$1187港女質疑是慣性套路

點菜埋單要留神！有網民近日分享出外用膳的不快經歷，指與家人走到黃大仙一間酒樓用膳，並叫了一個價值698元的晚市套餐B，埋單時卻變成1,187元，她於是與店員了解情況，最終從電腦收據上，發現酒樓將上菜的菜式，變成了另一款索價較貴的套餐A。不過，更令女網民不忿的是，儘管餐枱的手寫單仍是B餐，但女職員卻以「你食咗喇喎」為由，焗事主「埋貴單」。

最新影片:

女事主於Facebook群組「黃大仙區友」指因有內地年老親戚來港，於是便到酒樓，叫了一個供4至6人食用、價值698元的套餐B招待，不過卻想不到埋單時竟多出3百多元，最終從電腦收據，發現是上錯菜式之故。酒樓將她原先叫的套餐B，上了另一款標價998元的套餐A，而合計小費等其他費用，整張單共1,187元。

女事主於是用手寫單上標明是B餐與職員理論，對方卻以「你食咗喇喎。」、「「你冇留意條魚唔同？食之前你唔出聲？而家你食咗，你享受咗，咪當同老人家食餐豐富啲囉⋯⋯」回應，但女事主卻認為酒樓職員是「趁住全枱老人家傾計 冇留意食咗」有混水摸魚之嫌。

女事主指A餐同B餐，雖然前者是用龍蝦及星斑、後者則是用蝦球及虎杉斑，但其他小菜是完全一樣，指「老人家掛住傾計，留意唔到，要硬食」是十分不合理，又懷疑類似事件非第一次發生。

從亞姐嘅專業反應和對答自如，有理由相信 唔止一次發生此類事件啦，好明顯係刻意落個貴餐，收貴幾百蚊！

女事主最後指為了息事寧人，最終有埋較貴的單，惟令「老人家好肉赤，離開酒家仲好唔憤氣」，她亦不禁於文末問網民「究竟落單果個錯，定係食果個錯！」，又指店方不老實，「發誓以後唔去」。

▼點擊圖片放大

+3

+2

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

【ET Club會員積分獎賞計劃】用App換獎賞︰https://onelink.to/keyuqm

責任編輯：羅嘉欣