照顧媽媽︱8旬媽媽走路論盡拒用拐杖孝順女無奈 長者愈是愛逞強自尊心特別重

家事百科

發布時間: 2024/02/22 13:20

分享:

分享:

《白日之下》劇照

孝順女滿肚子氣,投訴年屆八十的母親難以侍奉,兩母女經常意見不合而吵個不停。

「我阿媽走路愈嚟愈論盡,咁我咪買咗枝拐杖俾佢用囉,點知佢話樣衰喎,唔肯用,怕人笑。如果真係跌倒,到時坐輪椅咪仲樣衰!」可以想像女兒的出發點是善意的,但說話方式卻弄巧反拙,結果觸怒了母親而弄致母女倆吵架告終。

「我阿媽記性愈嚟愈差,煲落湯又唔記得,真係好危險,我話請個懂得講廣東話嘅印傭服侍佢,點知佢一口拒絕,怕有個外人喺屋企會偷嘢喎,真係激死我!」不少老人家都抗拒家裏住個陌生人,尤其是性格獨立愛逞強的長者,最討厭被照顧,因為那是承認自己是弱者的表現。

「我阿媽成日發我脾氣,我講乜佢都唔啱聽。」她是我朋友當中,最緊張阿媽的孝順女,奈何她跟年邁母親的溝通方式,確有不少進步空間。

有些說話,說者無心,聽者有意。我也曾說過不少觸動母親神經綫的說話:「阿媽,趁你仲行得、走得,跟我去多啲地方旅行啦!」我直腸直肚,以為游說她跟我一同旅遊,誰知母親大怒:「你咁講係乜嘢意思?即係話我快不能行,不能走?」那年我的母親只有七十多歲,健步如飛。

又有一次,我偕母親外出午膳,那商場需要下樓梯才能到達酒樓:「媽,我扶你!」我急忙迎上,誰知母親使勁把我推開:「哼!我使乜人扶呀!」那年家母年屆九十,行動自如,最討厭別人幫忙。

愈是愛逞強的長者,自尊心特別重,跟他們說話不宜太直接或欠修飾,要懂得掌握他們的心理:「阿媽你好叻呀,我行樓梯都有啲論盡,不如我哋一齊行。」然後順勢倚着她。「阿媽,依家流行新式推動椅子,坐一架去遊商場都好架勢喎,不如我哋去睇吓囉!」老人家要氹的!

TOPick學生進步獎2024現正接受申請:https://tinyurl.com/progresstpartx

HKET App已全面升級,TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5

撰文 : 鄧藹霖