抗癌勇士丨文頌男五次化療冇效腫瘤反變大 　深受打擊感灰心：不想離開大家

主持J2節目《不正常愛情研究所》文頌男（Koba）在去年12月自揭有大概6×6×4cm的惡性腫瘤在椎間近盤骨附近位置，屬罕見病症，已停工休養正接受治療。

由於要面對龐大醫藥費，令Koba經濟非常拮据，其好友陳栢昕（Yanice）為對方籌醫藥費，希望有心人可以捐款助Koba解決治療及日常生活開支等燃眉之急。

J2患癌主持文頌男樂觀抗病魔　接受化療眉髮盡甩幽默自稱：變埋無眉男

分享最近的病況

一直以來Koba樂觀抗病，亦在社交平台分享其抗癌點滴，今日（3月27日）他分享最近的病況，又指醫生宣告5次化療無效，並發現腫瘤沒有縮小，反而變大，令其大受打擊，言詞間更感受到他的痛心無奈。Koba亦上載在醫院照，見他消瘦不少，面色亦較差，不少網民留言為他打氣。

他指每次化療也非常痛苦，當醫生告知化療沒有效用時，心情跌入深淵：

「做咗五次化療，每一次都好似經歷生死，肉體上好難受好辛苦，而且所有毛髮都甩晒，個樣好似妖怪咁，到後期仲開始痛返。我真係覺得好無奈，好似咁辛苦但係完全冇意義。

另一方面，到真正聽到醫生話：『個治療冇乜效果、個腫瘤仲要大咗少少，最後一次化療都唔好做喇，準備做電療啦。』嘅時候，我心情喺嗰刻好似跌咗落深淵。」

▲ Koba透露最新病況。

他又指很害怕會死得很痛苦：

「同時，我真係好驚，感覺距離死亡又近咗一步，而且可能唔係死咁簡單，係會死得好痛苦，因為我嘅下肢 、盤骨附近嘅位置係越嚟越痛，痛到開始連嗎啡都冇辦法舒緩到，身體仲會不自覺抽搐，有啲身體部位已經變得麻木，排泄方面都開始出現好多問題（呢部分太羞恥都唔想講太多），我開始有種感覺係『我活得好冇尊嚴』，因為行動不便、痛，每日都係喺屋企對住四埲牆，幾乎零社交、零工作，每日都活得好似好無意義咁。

我成日都好驚，我真係好驚，好驚，好驚可能臨死前會半身不遂、全身插滿喉管、無時無刻都伴隨住巨大嘅痛楚、意識唔清醒又表達唔到自己。」

Koba續指由小到大也有不同難關，很像上天不願意放過他：

「捱咗咁耐、咁辛苦、無一刻可以放鬆，有時唔知為咗乜嘢。我咁大個人，都未活得輕鬆過。由細到大都遇到唔同難關同挑戰，就算每次嘅挑戰都越嚟越困難，但我都靠自己一一跨越過，但個天就好似好想我死咁，唔肯放過我，唔想畀我輕鬆。

喺我以為終於生活可以穩定啲嘅時候，又畀咗呢一個難關我，而今次我覺得我真係控制唔到，冇辦法靠自己去解決。

就算我想放棄，但其實根本唔知可以點放棄。我未死嘅話，我只能夠選擇堅持。依家我每日都痛、非常痛，無一刻唔痛，每日度日如年，我唔知幾時可以開始電療、幾時先可以舒緩到我嘅痛楚，我只係盼望可以快啲唔痛。我真係覺得好攰、好攰、真係好攰。」

▼點擊圖片放大

+4

+3

他透露這段時間學懂活在當下：

「我諗好多癌症病人即使表現得有幾堅強、幾樂觀都好，都會有我以上類似嘅諗法。但會咁樣諗唔代表我放棄，我仍然好努力對抗呢個病，即使幾唔想食嘢，都逼自己食；即使幾痛都好，都逼自己要郁吓，唔好畀啲肌肉退化得咁勁。

呢段時間雖然我喊好多，但喺可以笑嘅時候，我放聲笑；想講咩嘅時候，盡情去講，唔會再收收埋埋，因為有啲嘢，依家唔做，以後唔知仲有冇機會做，唔諗咁多未來，活在當下，享受依家仲有嘅嘢。」

▲ Koba

他感謝各界為其打氣，並表示不想離開大家：

「我仍然好熱愛我嘅拍攝、演出工作。好希望有一日可以康復、行動自如，可以繼續返呢啲工作。亦都好想繼續可以留喺我愛嘅人身邊、我嘅朋友、家人。我多謝我嘅家人、朋友、我最愛嘅好兄弟、老闆、同事同喺網絡上唔認識但默默打氣嘅所有人，你哋一直支持我、照顧我、體諒我。我愛你哋，我好唔想離開你哋。」
 

最新影片推介：

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick WhatsApp頻道睇最新資訊︰http://tinyurl.com/3dtnw8f5