聲夢小天后丨炎明熹生日前推出新歌《還有一艘救生艙》　拍MV與男主角拍纏綿鏡頭零尷尬

明天（4月9日）將踏入19歲的炎明熹（Gigi），在生日前夕推出全新歌《還有一艘救生艙》慶生，今次新歌更採用了全新班底炮製，曲、詞由KW朱敏希包辦，編曲及監製有小彤賴映彤。
 
炎明熹介紹新歌表示：「係一個全新嘅合作，好開心可以喺佢哋身上學習更加多嘅嘢，當我第一次聽到呢首歌嘅時候，第一個反應係：『嗯！呢首歌，好聽！』，同埋我好鍾意份歌詞，雖然只係一份DEMO詞，但我決定原汁原味保留，因為個內容好打動到我，我仲係第一次睇歌詞睇到喊。」

逆天奇案2丨Gigi客串演出騷纖腰跳唱《Little Magic》　Gigi自爆學詠春想拍動作戲

▲ 炎明熹推出新歌《還有一艘救生艙》。

Gigi獻出多個第一次
 
對新歌「一聽鍾情」，Gigi更首次大膽地向監製提出編曲上的想法，說：「因為歌詞有提到外太空，所以我將幾個意見話咗俾小彤聽，尤其我想喺首歌嘅前奏部份，俾人一種好遼闊同空曠嘅感覺，小彤都做到，好感謝佢接受我嘅意見。」
 
除首次參與編曲，Gigi更在MV裡奉獻多個第一次。今次MV的故事講她與男友長期分隔異地，但對方卻背著她另結新歡，事件最終被Gigi發現，令她心如刀割。

最新影片推介：羅子溢專訪

Gigi決堤式流淚
 
導演要求Gigi拿著手提電話幻想與男主角對話，此時她的淚水決堤式滑落、雙唇不自覺地抖震，呈現被感情出賣的那份痛。

Gigi稱：「開拍MV前，導演已同我講咗一次個故事，雖然我冇經歷過，唔可以話身同感受，但至少拍MV時俾到我一種纏綿、開心、幸福嘅感覺，當然我哋嘅男主角 Timothy好帶動到我入戲，我亦冇諗過會喊到出嚟，平時一係喊唔到，一係就谷住咗，feel到要喊，但又冇眼淚，所以今日係好幸運嘅一天。」
 
除以上因素，原來當時手機顯示的時間，也觸動了Gigi的淚線神經：「「其實手機都有好大嘅幫助，因為當我想打電話嘅時候，個時間咁啱係『520』（國語：我愛你），所以一望到就喊。」Gigi說。

▲ 炎明熹新歌《還有一艘救生艙》MV。

首次玩滾軸溜冰
 
第一次拍MV淚崩，也是Gigi第一次拍MV與男主角如此親密。雖然《還有一艘救生艙》是首悲慘情歌，但導演加入了大量二人甜蜜的拍拖畫面，包括在無人的街上拖手擁抱、在電話亭互餵蛋糕，還有到遊樂場玩滾軸溜冰。

但最搞笑是原來Gigi與男主角Timothy從未玩過滾軸溜冰，兩人根本舉步難行，更遑論要在鏡頭前談情說愛，最後導演讓他們脫去溜冰鞋，穿上襪子在場內「扮溜冰」，兩人才鬆一口氣，在鏡頭前展現頭貼著頭的甜蜜畫面，說：「上次拍《Only For Me》MV跳華爾滋，我覺得已經同男主角好近，估唔到今次更近，算係一個新嘗試，同埋大家投入咗喺戲入面，所以唔會覺得尷尬，或者有唔舒服嘅地方。」

▼點擊圖片放大

+6

+5

 
至於在拍攝時，不時見到Gigi忍不住笑，解釋：「其實我笑點比較低，我忍唔住笑唔係因為尷尬，係自己搞到自己笑，例如剛才我見到男主角出軌嘅訊息，對方留言話：Do You Want Me？再加埋個心心emoji，我一見到就笑咗，覺得好肉麻，同埋我平時影相，啲人叫我俾心心，我係唔會做，因為俾心心我覺得有啲尷尬，所以剛才一見到就笑咗出嚟。」

身為未拍過拖的「A0」，卻要在MV內代入一段Long D關係，Gigi於是問人甚麼是Long D，笑著說：「原本我唔知係乜，但問過人，原來係一段異地戀嘅關係，唔知自己將來會唔會接受，但暫時覺得係可以接受，因為未經歷過呢種情況，可能都係一個好處，因為日日見好快會厭，但隔一排再見就可以有新鮮感，大家不妨留言話我知，分享你哋嘅故事俾我聽。」

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick WhatsApp頻道睇最新資訊︰http://tinyurl.com/3dtnw8f5