看淡生死丨余慕蓮預告將入住護老院　童年生活苦痛恨母親：我是人球

余慕蓮在2020年因患耳石症，後來因咳嗽不適入院證實患有肺纖維化，一度於深切治療部（ICU）留醫，幸好最後走出鬼門關，雖然大病後身形偏瘦，且走路時要傭人攙扶，但幸好精神不俗，不時見她現身好友的聚會。

近日她接受好友汪曼玲的網上節目訪問，透露近日身體狀況麻麻，雖然最近要經常出入醫院，不過未有影響她的心情，余慕蓮說：「我賺咗喇！上次我以前自己死梗，點知又畀我玩多兩、三年，我覺得好開心，賺咗。」

余慕蓮不小心鯁骨入急症　魚毛姐大病後偏瘦要傭人攙扶

最新影片推介：羅子溢專訪

獲得多個圈中人幫忙

余慕蓮指當時病重時，獲不少圈中好友金錢上的支持，很多朋友對她很好：「好似小恩子（黎瑞恩）捐咗10萬，不過啲錢我冇要，捐咗去兒童癌症基金。胡杏兒又捐咗10萬，馬騮仔張衛健我同佢係好少合作，嗰陣佢喺北京，知道我有事即刻匯錢畀我，我仲好笑，唔知佢匯咗7萬定8萬，我就去銀行，問係咪7千，點知原來我係睇少一個零。」

汪曼玲又提到余慕蓮與米雪的感情特別好：「因為米雪係曹達華契女，我打電話畀佢，原來佢返咗內地拍嘢，不過我同佢其中一個妹好friend，成日出嚟飲茶。」

▲ 余慕蓮 （經濟日報圖片）

將到護老院暫住

在訪問上，余慕蓮指因外傭姐姐要放假一個月，所以她將到護老院暫住，直到姐姐放完假返港才回家。
她又直言自己人生沒有遺憾，比上不足比下有餘就算。

童年生活慘 與母親關係差

不過提到與媽媽的關係，余慕蓮自言從來都冇母愛：「乜嘢叫母愛就係冇人愛，佢15歲結婚16歲生我，佢貪慕虛榮嚟咗香港，因為佢靚，有好多男朋友，佢唔鍾意啲女，我對佢冇釋懷，死咗都唔會喊，我從來都冇得到母愛， 唔好講佢，一講我就㷫，所以佢死我一啲感覺都冇。」

其實余慕蓮曾接受TOPick專訪直言童年過得很苦，很不快樂，小時候像人球般，香港內地兩邊走。結果11歲才讀小一，小學畢業時已經17歲。

所以每當提起媽媽鄧美美，她便很生氣：「我是人球來，我廣州來香港，媽媽離婚後帶我來香港，我妹在廣州，媽媽認識男朋友後又掉我上廣州，甩拖又接我回來，所以我憎我媽，我媽有男朋友便會把我掉到廣州爸爸家！

▼點擊圖片放大

+8

+7

早立平安紙

如今看透生死的她回望半生沒半點遺憾，更早已為自己立下平安紙：「一早寫好，因為我無人無物，將來瓜老襯，間屋都值幾百萬，已經寫好會捐去東華三院。身後事都有安排好，因為人遲早排隊都要走，計劃好總好過比人呃，比人呃仲心噏。我一向不太看重錢，人最緊要健康，現在連健康都無乜，瞓醒一日就當是膁多一日，千萬不要想太多。」

▲ 余慕蓮（經濟日報圖片）

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5