神耆小子丨樊亦敏獲封「啱數版何太」　「妙音龍子」冼靖峰穿縮水背心派福利

《東張西望》報道的何伯何太「忘年戀」成為城中熱話，無獨有偶，TVB劇《神耆小子》劇情亦有紅顏知己洪玫瑰（樊亦敏飾）和親生仔女「爭產風波」，再加上玫瑰對錢大海（鄭則士飾）照顧周到，煲湯、煲粥、整糖水、焗蛋糕全部做齊。

而對玫瑰錫到燶的大海又大送首飾，「神巧合」情節吸引網民在無綫官方社交平台的宣傳片下留言：「新何太合晒時機呀，天時地利都冇咁夾，勁」、「預知能力」。

神耆小子丨魯振順感恩與偶像Kent哥合作　樊亦敏露香肩玉臂拍「床照」

▲ 《神耆小子》

樊亦敏大賣關子

搞笑的是，還有網民主持「公道」，指玫瑰即使「貪錢」，亦「盜亦有道」，笑言她是「啱數版何太」：「我覺得玫瑰都係貪大海啲錢，但至少佢喺大海身邊默默耕耘咗足足12年」、「Rose姐除咗煲湯煲糖水照顧周到，仲要幫大海公司解決咗唔少危機。咁就算貪錢，都叫貪得啱數好多。」

對於遭網民指角色與城中新聞人物「神巧合」，並獲封「啱數版何太」，「玫瑰姐」樊亦敏笑言：「首先多謝大家咁記得我呢個角色，其實玫瑰同大海係咪真愛，大家睇到落最尾就自然有分曉㗎喇，其實我同佢有段好浪漫嘅往事聽晚就播，大家密切留意呀。」

冼靖峰大放笑彈

至於昨晚（5月15日）播出的《神耆小子》劇情，講述繼來（曹永廉飾）懷疑玫瑰皇后糕秘方外洩，獨自深夜前往聶總（魯振順飾）的三耳家調查，豈料被逮個正着兼被拉上警局！聶總藉此威脅大海（鄭則士飾）合作，大海原本不欲就範，但為了救兒子繼來，只好向死對頭聶總屈服，盡顯平時收收埋埋的父愛。

另一邊廂，大海在一鳴（冼靖峰飾）幫助下，發現偷走繼來合約的人是阿Jack（吳子冲飾），遂威脅玫瑰（樊亦敏飾）講出真話，玫瑰為了保Jack竟扛下所有罪名，二人關係耐人尋味。

身為「演戲初哥」的「妙音龍子」冼靖峰（Archie）繼續大放笑彈，劇情講到阿勇（蕭正楠飾）不小心將一鳴的白色背心洗到縮水，穿上「縮水小背心」後的Archie全程尷尷尬尬、樣子趣怪喜感十足之餘，小背心還突顯了Archie平時收收埋埋的脹卜卜胸肌和麒麟臂，相當搶眼。

▲ 《神耆小子》

與阿蕭一輪打鬧及混戰後，最終Archie被阿蕭意外扯爆小背心而意外露點，場面爆笑。

對於Archie的鬼馬演出，網友紛紛留言讚好：「好有喜劇細胞，喜感十足！」、「好好笑Archie」、「估唔到Archie完全冇偶包，豁出去演出，勁！」

▲ 《神耆小子》

臨時加插穿小背

Archie受訪時透露穿小背心場口是臨時加插：「所以事前冇專登操Fit，係臨拍嘅時候先話不如着件小背心玩吓，知道要着小背心都即刻做咗幾吓掌上壓，但都冇乜用，從嗰日開始我同自己講，一定要所有嘢隨時Ready，唔止淨係演技，身材都要Ready！」

他續透露拍攝花絮：「因為件小背心得一件，所以得一次扯爛機會，爛咗就冇第二件，拍嘅時候有傾過點樣扯爛件小背心，但就冇傾扯爛之後會發生咩事，當時已經係拍攝嘅中後段，我同阿蕭都好相信大家，所以扯爛嗰吓嘅反應係最真實，希望觀眾都鍾意呢場戲啦。」

最新影片推介：周家蔚專訪

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick WhatsApp頻道睇最新資訊︰http://tinyurl.com/3dtnw8f5