武打明星｜陳惠敏談80年代大富豪一晚豪花10萬　80歲驀然回首自認當年戇居

最近在串流平台上，睇到昔日打星兼江湖大佬陳惠敏接受訪問，講到當年荒唐生活，尤其八十年代有錢時唔識理財，只晚晚走去威。乜叫「威」？即蒲在大富豪及中國城一類揮金如土銷金窩，「隊」XO猜枚。江湖中人財來財去，今日你請我，明日我請你，就咁晚晚十萬八萬埋單（八十年代呀，當年幾十萬買間千呎樓㗎！）。

要「威」，當然少不免成身金鏈及揸歐洲名車林寶堅尼法拉利等，在尖沙咀「嘭嘭」聲四圍片。就咁，又無咗幾百萬，之後，二手出售完全唔值錢。

好嘞，如今八十歲嘞，驀然回首，才覺得當年戇居，搞到身體又壞，錢又無乜，更唔敢話俾個仔知自己其實「出嚟行」，成日俾人拉。

老陳坦率豁達，最難得老婆十七歲跟佢同居，一直無名份，只是早幾年才註冊。一切一切，足以拍套精采的江湖電影。

訪問中，陳惠敏多次提及大富豪，而剛剛早前有消息話「大富豪夜總滙」正密鑼緊鼓再捲土重來。

係真唔係真？我肥碌絕對存疑。今時今日香港氣氛，你想搵班大闊佬或江湖人士晚晚掟十萬八萬「威」？發夢無咁早！尖東未到九點已水盡鵝飛，經濟咁差，人人窮到燶喎。

奇在，月初在社交平台上流傳一份「建議書」，邀請公眾參與投資「大富豪夜總滙」，小弟一睇已知騙局，非常騎呢，心諗：「傻嘅才會信！」

雖然我咁諗，但肯定一千個會有一條水魚中招，結果搞到證監都要出聲明踢爆。大千世界真怪雞！

更多關於陳惠敏的報道：

武打演員丨陳惠敏3年前發現患腦癌　惠敏哥直言：話唔驚就假係人都怕死

【武打演員】陳惠敏精神奕奕出席江湖猛人大壽　曾患肺癌與相戀50年老伴結婚

【戰勝癌魔】陳惠敏承認患肺癌稱已痊癒　與攜手行半世紀老伴入紙結婚

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick WhatsApp頻道睇最新資訊︰http://tinyurl.com/3dtnw8f5