叮噹抑或多啦A夢？

▲ 圖片來源：youtube截圖

早幾日香港資深配音員林保全離世，很多傳媒都有報道，臉書上都有不少有關佢離世嘅消息。阿史有個朋友都於臉書上寫：「『叮噹』離開我哋喇！」不過就有留言作出「更正」，話「依家叫多啦A夢，唔好搞錯。」一時又叮噹，一時又多啦A夢，究竟是甚麼一回事呢？

相信大家都知道，多啦A夢係日本著名動漫ドラえもん的主角，他係一隻來自未來的機器貓。但點解會叫做叮噹呢？咁要講講最先將呢本漫畫引入香港的《兒童樂園》。話說這本兒童刊物於70年代引入多啦A夢個陣，唔知點樣將「ドラえもん」、「野比 のび太」的日文名翻譯做中文名，結果就將裡面的角色完全「中文化」，多啦A夢就叫做叮噹，野比就叫大雄。至於點解叫叮噹，好似話係這隻機器貓掛住個 啷啷，所以叫咗做叮噹喎！

其實呢種日本動漫角色「名字中文化」，於七八十年代非常普遍，基本上如果個角色名不太似中文名都會被「改名換姓」。例如《足球小將》主角大空翼叫做戴志偉，若林源三叫林源三，《六神合體》主角明神タケル叫做李大龍等，例子就不舉太多！有電視台前輩話，咁做可以令觀眾對套卡通更有親切感，避免咗不識譯日文名這個問題。

咁點解叮噹後來又叫做多啦A夢呢？原來ドラえもん作者藤子‧F‧不二雄有個遺願，就是將亞洲各地區「叮噹」統一改以日本音譯的名，而這個「正名化」就令到香港家傳戶曉的名字「叮噹」變做接近日文發音的「多啦A夢」喇！而裡面的角色像技安、阿福、靜宜都要改做日本名。

講開又講，年紀唔細的阿史，至今仍然叫慣咗做叮噹….

文章經Topick編輯。內容獲facebook專頁《史檔》授權轉載，原題為 :【講開有段故】多啦A夢定叮噹？