莊偉忠兒子畢業禮撐黃傘：我感到驕傲
發布時間： 2015/04/24 12:14
最後更新： 2015/05/05 15:17
既然形象正面，企管又頭頭是道，「不如俾個特首你做吖？」莊偉忠耍手擰頭，說香港已經走了入死胡同，好難管。
我只能奉勸（特首及高官）一句，要以誠懇待人，「真」永遠是無敵的。
港人常常自娛說要找華仔、發哥做特首，原因不外乎二人印象討好，待人以誠。莊偉忠這位商界大好人做特首又如何？若果俾個香港你管，你管唔管得掂？
政治呢，今日已跌了落死胡同，香港的確愈來愈難管。
他歸咎於現時香港實在太多喜歡講高瞻遠矚大有為的政治領袖。
他們能力是否相稱，我不便評論。由「建華」八年開始，我們有中藥港、時裝港、數碼港仲有八萬五，統統都大有為。
其實香港自戰後發展得最好的模式叫自求多福，市民其實唔使政府咁大有為，反而俾返多少少空間，大家各自發揮小宇宙。
對管治班子感悲觀。由始至終，莊偉忠也認為一個機構根本不需要一個「好叻」領袖。
我是個好好例子，同事幫我，大家又信我，事半功倍。但依家佢（特首）幾叻都無用，事倍而功半。
然而，幫與不幫；信與不信，都非一日之寒。
過去7年我接受傳媒訪問起碼1,000次，其實我講來講去三覆被，連我老婆都話：你好鬼悶呀！但我說話一致，你可驗證我7年有否前言不對後語。但你成日變，又鬧人對你無信心，咁唔得囉！
他舉最近「三跑」事件，政府雖可以司法程序繞過財務審核，但到底項目一出事，埋單的是全港市民。
絕不能重蹈高鐵的覆轍。依家插咗入來，你先話唔可以一地兩檢。條路根本同東鐵一樣，咁點解要俾咁多錢起呢？上次試過咁樣，今次投資仲多，你想人信你，係咪都應該講清楚呢？
對於香港今日的狀況以至管治班子，莊偉忠坦言有點悲觀。
我只能奉勸一句，做實事的同時，最重要是以誠懇與人建立關係。至於你有無能力叫人信，就要講功力啦！
教他們學懂不變真理
亂世中，有一個令人感到悲觀的領導班子，年輕人也被指愈來愈激進。身為兩個二十出頭年輕人的父親，莊偉忠沒覺甚麼：
今日他們好似比較激進，但時光倒流50年，依家老咗的一輩，當日咪又係咁激。
年輕人本性就係唔服從權威，現時環境更複雜，要佢哋學似我哋以前咁做順民，根本無可能，亦唔係話睇多兩次升旗禮，返多兩次大陸甚麼團就可以加深佢哋對一個地方的愛。
在這種世態下，「大人」或者更要學懂放下身段，
連兩個仔唔聽我我都無辨法，更何況街外人？或者只能夠給予更多耐性和解說，而唔係頓起個款。
面對大是大非，莊偉忠教導兒子要企硬不含糊。
父子齊撐黃雨傘
莊偉忠去年底參加了一場TED演講，講的是返璞歸真。在PowerPoint上，出現了一位身穿畢業袍、撐著黃傘的青年。
莊偉忠如是說：
呢個小朋友在科大畢業禮上，第一個撐著黃遮上台，當時台下有人拍手有人噓。但如果我係佢父母，我會覺得好驕傲，因為佢夠膽喺一大班人面前表達自己的諗法……我就係佢老竇。
這麼的一番話、一場身教，博得全場掌聲。
莊偉忠早前在Facebook細數自己2014年大事時，當中便包括「一次金鐘瞓街」。
他在回顧的結語時說：
365日漫不經心，一書在手，二子在旁，嬌妻常伴左右，可謂快意平生。但……79日雨傘抗爭，從此刻骨銘心。
服務本土有乜錯？
自由行減少、一周一行最近鬧得熱哄。縱觀整個零售界，每次有事就撲出來說「香港無自由行死梗」者眾，但立場鮮明地反對繼續開放自由行的商家，從頭到尾只有莊偉忠一人。
百貨行業有句話，叫「百貨應百客」。所以他的營商之道，是打開門做生意，甚麼人也歡迎，但就不會扭曲自己刻意配合。
我真係未做過十一黃金周，這是商業策略嘛！如果我唔覺得我做得比人出色，點解要做呢？正如世界杯我都係求其擺幾個波就算，唔通你覺得我會做得好過Nike？嘥氣！
他認為，自由行可以是金主但也可以是這城的過客。
遊客唔係街坊，佢哋住好遠架喎，咁唔來幫襯有幾出奇？咁我主張公司應以本土為主又有乜錯？但今時今日咁講就會被解讀成歧視。真係開玩笑！
香港小蛇被大象吞噬
甚至近日香港股市爆升，沒有投資A股甚至連港股都不諳的莊偉忠，也將自由行的評論，套用在港股通上。
我睇到嘅，唔係商機，而係危機。中港兩地經濟總量相差太遠，香港這條小蛇，啃唔落呢隻大笨象。有背景、有實力的北方投資者，一定早已在香港股壇插旗，根本毋須借助港股通。
我反對嘅係，香港開埠170年，自求多福，逢凶化吉，何曾倚仗他人。何解回歸17年，自甘墮落，每遇困難，就北望神州，搶天呼地要這要那，也不害羞，一旦養成倚賴之心，從此意志消沉，仰人鼻息，萬事皆休。天行健，君子以自強不息；地勢坤，君子以厚德載物。
原文刊於iMoney智富雜誌第391期（收費閲讀）。標題經TOPick 編輯修改，原題為「不需大有為籲政府以誠做實事」。
iMoney智富雜誌facebook
撰文 : iMoney 智富雜誌
