老細總愛說騙人的謊話

我是一位肯博肯捱的打工仔，每日朝早叫醒我的不是鬧鐘，而是老細發號司令乜乜乜的連串WhatsApp鈴聲；凌晨12點當我已經瞓到死豬時，我亦都可以9.9秒速度回覆﹕「收到，我半小時搞掂」，然後一支箭開電腦，兌現我的「服務承諾」。

同事人人話我戇居，唔值得為公司博，點解? 因為李老闆為人縮骨卸膊。可是我從來沒有怨言，深信老細知道邊個「最打得」。

不過我太天真太傻，一切由加人工說起:

老闆: 阿John今年公司生意麻麻，下年加人工會好d......

我: 即係.....加幾多?

老闆: 500，其實唔算差，邊個邊個一定唔夠你多

我: 但我平日最幫得手喎

老闆: 我知，我最睇好你，有計劃升你，不過等下年生意好d先啦，你比心機做，有機會嘅

我: ......

▲ (相片來源: 法新社)

今日返工睇新聞，見到中國天獅集團（Tiens）老闆李金元花逾億元請了6400名員工到法國巴黎、康城、尼斯和摩納哥4天豪華遊，成班人穿上藍白色制服在尼斯海灘舉牌拼字：「TIENS’ DREAM IS NICE IN THE COTE D’AZUR」(天獅的夢想在尼斯綻放)。

▲ (相片來源: 法新社)

好多花生友留言，嘲笑別人是土豪、強國最牛，但我卻深存羡慕。雖然要幫手做show，在海灘狂叫兩個鐘頭口號，如果我那個李老闆肯請我們去旅行，莫講是法國，即使日本、泰國甚至台灣，我都會好開心。不過同事A話﹕

你都傻傻地，老闆平日咁縮骨，有錢都自己洗，仲乜要請你去旅行先? 佢成日話，做好係員工應份，請去旅行，發白日夢啦！

同事B聞言插咀，更點出縮骨老闆4個通病:

1. OT從來無補水

次次臨收工，通常是下午5點45分，老細都會拎住幾份文件走出房間，然後用急速的語氣講：「大家幫幫手，呢幾份文件趕住明天早上比陳總，今晚餐飯入我數！」

結果大家「奉旨」作戰到8、9點，所謂的晚餐往往只是一個大Pizza。

2. 公司賺大錢  打工仔加「雞碎」

打工仔每年最開心，莫過於發花紅及加人工，不過我完全無期望，因為公司年年都是加2%-3%，貫徹「做又三十六，唔做三十六」的文化。

至於花紅，老細年年說「經濟不好，利潤薄，大家明年繼續努力」公司去年以佔中為由，（利申：公司在新界區，完全不受影響）減發花紅，「不管你信不信，反正我就要信了。」

同事口痕說﹕「早前取消一簽多行，睇來老細今年又有藉口，繼續減發花紅。」

上個月發加薪信，老細可能見我拆信後黑臉，於是點名叫我入房並語重心長地說：「我知你做得野，幫到公司手，我睇好你架！後生仔，公司俾足機會你學習，不要只在於眼前那少許利益，要睇長遠d」，我心想

我打工是為了賺錢......

3. 開工利是20元

你別安慰我，利是只是意頭，金額多少都不重要，但今時今日，20元可以買到什麽？最平的22元麥當勞餐都買不到。年尾收爐、年頭開工，其他公司起碼都有團年飯，李老闆繼續貫徹慳皮風格，一個大Pizza搞掂。

因為Pizza外賣自取七折，我當然要幫手去拎外賣。

4. 揸住雞毛當令箭

昨日經過銅鑼灣見到「保普選反暴力大聯盟」擺街站，收集市民簽名支持通過政改方案，我當然打死唔簽，點知今日返工李老闆係公司大大聲話﹕

各位，今次普選特首真係一人一票，有好大進步，大家都想香港繁榮安定，我好鼓勵大家簽名支持!我地係中資背景，當然要支持國家，係未?」

此刻，隔離位同事爆了一句﹕「唔簽又點?」

老闆立即黑面，話﹕「唔簽就入房傾下，我想了解你地年輕人諗乜，點解唔簽，背後理由係乜?」

辦公室死寂一片，同事暗暗地話﹕「上次反佔中已經簽左次，今次又要被逼簽多次! 我仔細老婆嫩，驚無左份工。」

我慶幸自己無兒女，東家唔打打西家，就在此時，老友打電話來﹕「我老細今日叫我簽名支持政改，我唔想呀﹐點算?」

唉﹐可憐天下打工仔。

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。