以後打死都咪話人知去旅行

休閒 14:24 2015/05/21

分享:

去旅行為何要周圍唱、打鑼打鼓話人知?

正宗港女可能會答你,男朋友帶我去歐遊,所以我要曬幸福。勤奮打工仔可能會答你,捱生捱死終於有假放,所以我要曬命。終於捱到仔女出身的媽媽可能會答你,上次隔離屋陳師奶串我無旅行去,所以我要還撃。

你去一次旅行,可能要貼皇榜公告天下,但當你聽完以下的經歷,保證你以後會學乖,不再大肆張揚你去旅行。

惡夢由我mark假開始......

由我一遞紙申請放假,公司阿姐Mary已經樣衰衰地走過來:「喂,你下個月去旅行呀,可唔可以幫我買嘢?」

係依個Moment,我只有兩個選擇。

一,指住Mary個鼻,大聲講:「唔得呀!宜家我去旅行定幫你走水貨呀?又唔俾錢我又冇著數,浪費時間幫你去買。」

二,不想阿姐reject你的假期,只可以死死地氣,立即戴個假面具,假到無倫答:「好呀,你想買咩?」

人類總要重複犯錯,無論去哪一個地方旅遊,只要你答應幫人「買啲嘢」,同事就以9秒9速度拿出A4白紙大叫:「邊個要順便買嘢?」

然後你只可以為自己將超重的行李默哀,亦不會有人可憐你會行李超重,被地勤殺多你幾舊水。

信不信由你,任何一個地方,女性動物總會「有啲嘢」要你幫她買,真人真事,去過幾個地方旅遊,下場都一樣:

1. 韓國

韓國要算是「行李超重高危國」第1位,皆因韓國是化妝品大國,當你告知同事、朋友去韓國,一班愛「易容」......呀!不是,是愛「美容」的女同事就會瘋湧而至,左邊一句「50塊蝸牛面膜」,右邊一句「5套雪花秀」。

相片來源:TONY MOLY fb 專頁

可能你會說,少少護膚品有幾重?我用數字答你。據面膜包裝資料,每塊面膜有約20毫升的精華素,單單一個同事的「50塊蝸牛面膜」已淨重1升,如果多幾位同事拜託你買蝸牛面膜,等於行李重多了幾升水。

2. 澳洲

如果港女朋友知道你將到澳洲旅行,她必要出盡辦法要你幫她買港女最愛的UGG鞋。一對UGG鞋未必會令你行李超重,但足以令你「煩到想死」。

甚麼是UGG鞋?其實是一對由羊毛製成的鞋,內裏亦鋪滿UGG羊毛,穿上腳十分保暖。

相片來源:UGG fb專頁

幫朋友買鞋已經夠煩,誰知道你腳大還是腳小,要穿甚麼碼?再加上UGG鞋顏色又多,又有星星、珠片,還分靴子及鞋子款。嫌煩不問朋友是但買一對?小心買錯了,朋友隨時黑面,然後怪你入錯貨,怨你十年八載係閒事。

3. 歐洲

你以為歐遊是你與Honey的事?非也,而是所有好姊妹的事。因為好姊妹一定拜託你「去米蘭買個春季新款Prada」、「去巴黎幫我買Chanel,退稅抵呀!」,你膽敢托手肘?小心姊妹割席絕交!

相片來源:Chanel 網站

幫手買手袋沒問題,但我哪有十萬九千七埋單?問姊妹們可否先付款,通常例牌答案是:「一場姊妹你唔係同我計呀,返嚟計返港紙俾你啦。」

下次不想再碌爆卡,記得不要再曬命歐遊。

4. 台灣

不要以為去台灣至多買食物當手信,女性動物真的甚麼東西都要買!別要以為去台灣隨便買幾件鳳梨酥便可打發一班女人。

少年,你太年輕了!現時一班女人已經轉移目標,洪瑞珍三文治、世界麵包冠軍吳寶春製作的麵包等等,這些手信並非隨便在機場duty free買到,而是要你大清早乘車到極不就腳的地方,再排一條長長的人龍,才買到幾件手信。

相片來源:洪瑞珍.com 洪瑞珍三明治香港新鮮速遞fb 專頁

去旅行最怕帶食物回港,不單止有保鮮期限,而且一定要hand carry,一個不小心壓到食物,隨時成個行李袋都污糟晒!

經過如此多次教訓,我終於學乖了,下次同事問:「放幾日長假去邊到玩呀?」我打死都不會再曬命,是但噏:「我係屋企做廢青做廢柴......」因為我知道即使去大澳一轉,總會有人搭單話要買蝦醬。

撰文:潮人

我叫阿潮,係一個人,來自潮洲。低調啲可以叫阿潮,俾面就叫聲潮人,鍾意寫潮文,香港發生咩事我都寫,潮文乜乜乜。

撰文 : 潮人