我當你一世朋友　關於友情9件事

「人生有個真正朋友的確好極！」朋友從來都是重質不重量，10個呃飲呃食的酒肉朋友，都比不上一個了解自己的真心好友。

在你的生命中，這位無可取締、對自己不離不棄的死黨又會是誰？

無論是「一世人兩兄弟」的兄弟幫，定是「晚晚Girls talk」的姊妹淘，以下關於友情9件事，總會引起大家的共鳴。

1. 你哋唔係成日見面

老友總不可能日對夜對，加上份工日做夜做，想抽時間見面都不是想像中容易。

遇著重色輕友的死黨，一個唔覺意就被放飛機。不過，作為好朋友總不會介意。

2. 但一見面就滔滔不絕，雞啄唔斷

終於約到死黨出來食飯！食咩不重要，最重要是有個地方讓大家吹水！

一吹就吹足4、5個鐘，講工作、講感情、講馬講波、呻窮呻肥咩都講一餐！

在好朋友的字典裡，就是從沒有 dead air 一字。

3. 你知道佢一件糗到爆嘅事

老友的相處模式很特別，你會自然地向他/她打開心扉，對住呀媽都從未如此坦白過！

亦由於無需隱瞞的關係，死黨總會知道自己的所有事，包括你的種種糗事！

每次提起單糗事，死黨都會亳不忌諱地笑到反艇，笑到你瞼黃為止！

4. 你哋會有一個老地方

你哋總會有個老地方約見，那怕是一起成長的公園、相識的球場、還是經常食飯的餐廳。

每次見面，這個老地方，就是屬於你跟老友的世界。

5. 你哋唔係未試過鬧交

對住老友，的確不是未試過燥底、黑面、甚至鬧交。

爭住追隔離班個Ｍary定是欠錢唔還？記不起了，總之你跟老友，就是不打不相識。

6. 但好快就和好如初

同老友炒完大鑊，不似得情侶鬧交，不需要冷戰10天8天。

一個轉身，搭搭膊頭，又friend番。

7. 你喺佢面前，唔顧儀態咁喪笑過

死黨面前，你可以亳無保留地表達自己，跟平時靜坐在辦公室、扮儀態先生/小姐的你判若兩人。

成餐飯笑多過食，哈哈聲大到隔離枱都睥住你哋，儀態？咩嚟㗎？食得㗎？

8. 亦都唔顧儀態咁喊過

喪笑之餘，對住好兄弟/好姊妹，你亦曾經忍不住喊過。

被人飛、工作失利、股票輸錢，有任何不開心，你都會第一時間想找死黨傾訴。

講講下，眼淚忍不住流下，你放聲大哭，因為你知道，這位死黨就是願意關心你、包容你的人。

9. 友情係唔需要語言，但彼此明白對方

友情是種奇妙的緣份，不需要花言巧語，更加不需要山盟海誓。

輕輕搭一搭膊頭，一起走下去，老友心照啦。

圖片獲作者Nothing Serious 授權轉載。