講到慳 我認第二無人敢認第一!

City 16:30 2015/06/02

分享:

每逢月頭出糧日,我老友阿強就Tony Stark上身,簡直腰纏萬貫,覺得人工永遠洗來洗去都是「面果浸」。

過了一星期阿強再去櫃員機噤錢,戶口結餘$68.9,即時阿姐上身「嚇到我個心離一離!」阿強於是cheap精上身問我撲水:「你可唔可以過40蚊去我戶口,等我噤埋個100蚊?」

見阿強月月清袋,我忍不住話佢兩句:「好心你儲吓錢!」

阿強:「得個萬幾蚊邊夠洗,仲話儲錢...」

其實,邊個話1萬人工就儲唔到錢?學「上車達人」大劉仔個仔話齋,去少啲日本、睇少啲戲,只要你肯捱三、五十年,年輕人上車其實一啲都唔難。

今日上網,見到一名月入8,500元的26歲年輕人,自稱每月可儲一半以上人工,自稱股票加戶口存款合共有25萬元揸手。

這名年輕人的確是可造之材!不過,我再望望他慳錢的方法,實在太辛苦自己了。想儲錢,問我啦!慳錢我敢認第二,冇人敢認第一!潮人由衣食住行列出慳錢大法。

我無做紡織業的家人,著不起Armani,但我可以每個月換新衫!秘訣?好簡單!不剪牌、記得keep單,一個月內完好無缺就可以到某某連鎖時裝店退錢。

當然唔係叫你所有衫都拎去換,但遇上見客應酬、同事朋友請飲、公司Annual Dinner、中學同學聚會麻煩dress code,「30日內退貨機制」都幫到你。

今日我還帶了「bb豬」去血拼:「bb豬,今日任買!」

嘩,幾霸氣。但我補充一句:「不過記得唔好剪牌,着完一個月拎返黎退錢!」

我以為「bb豬」會飛撲攬住我,然後大叫:「月月都買新衫,咁好的男朋友邊到搵?」

點知她一巴掌打過來:「死cheap 精,留返你自己著啦!」

近日老麥又有優惠劵,撞正阿強買超值套餐,在他比錢的0.99秒,即時遞上「送蘋果批」優惠劵,中午又有著落。

至於正餐同晚飯最慳錢的境界,當然是回家食飯再返工帶飯!

聽聞港女最鍾意食魚生壽司,眼見今個月儲錢成績不錯,還有洗閒錢的空間,於是我準時到「bb豬」公司接放工,然後說:「bb豬,今晚帶你食壽司!」

「bb豬」興奮地說:「好呀!我要食海膽、魚子、帶子!」

「當然無問題,月尾好好食返餐!不過我地拍下拖,行陣街先啦!」當然,千其不要去廣東道一帶高危地方,否則「bb豬」睇好手袋,你的荷包隨時失守。

然後到晚上10點,可以食壽司了。無錯,就是窮人恩物爭鮮,原價3蚊件,臨關門前15至30分鐘還有大割引,2蚊件。三文魚、海膽、魚子、帶子一應俱全,還不用加一!兩個人豪食,100蚊有找!

回頭問「bb豬」想食甚麼,只見她玄壇口面說:「你食自己啦!」

沒有物業的香港人,每月最大開支一定是屋租。如果你有一間公屋,已經贏在起跑綫上,一班租私樓捱貴租的人已經望塵莫及。

如果要成為人生勝利組,必須要有「廿四孝父母」,因為與父母同住,一毫子屋租都不用付。

不過每逢傳媒報道乜乜乜年輕人上車勵志故事,阿媽總會發口痕怨兩句:「牛高馬大,好心就自己儲錢上車啦,第時點結婚!」

此時你要啟動最天真、最pure、最true的乖仔mode:「講呢啲,我成世都痴住你架喇阿媽,搬出去點照顧你?」

又可做孝順仔,又可慳錢,何樂而不為?

正所謂早起的鳥兒有虫吃,早起搭車都可以慳一筆。雖然港鐵又加價,但只要我在早上8:15分前出閘,車費就有75折優惠。

不過,通常我都唔知醒遲到。但我還有後著,行15分鐘到某某商場1樓的「港鐵特惠站」拍一拍卡,即時可以慳兩蚊。既可多睡30分鐘,又可以慳錢!

小病咳兩聲,我通常都唔睇醫生,但當然要食藥啦,不過到藥房買藥都唔平,所以我返工都會靜靜雞到公司pantry拎止痛藥、乜乜傷風素,仲順手攞多兩塊膠布旁身。

如果你慳錢慳到這一個境界,相信你已經進化成一個「縮骨精」,距離無女朋友、無朋友的日子不遠,屆時零娛樂,連街都不用出,相信儲錢能力又會進一步提昇,上車指日可待!

以我現時月入1.5萬元,每月大約可儲1萬元,3、4年便有近50萬元積蓄。如果我心頭不高,買一層約300萬元的居屋不成問題!

阿強聽完我的上車大計,不屑地笑一笑:「對呀!上車後準備做成一世樓奴!」數數手指,我的慳錢無間地獄還要繼續二、三十年......

撰文:潮人

我叫阿潮,係一個人,來自潮洲。低調啲可以叫阿潮,俾面就叫聲潮人,鍾意寫潮文,香港發生咩事我都寫,潮文乜乜乜。

撰文 : 潮人