廣告狂人：從蔣志光看自由市場與政策市

昨日，我個菲律賓工人上網，睇到100毛個FB page，分享了蔣志光陳年麥當勞急口令廣告，我先係嚇一跳，然後今日先至識得笑。

眾所鳩知，100毛玩到毛記電視，已經係銀河系級數抽濕機，即抽即中，何解要無啦啦「退一萬步」出Po講返幾個月之前瘋傳嗰段廣告片？嗯，耐人尋味。今日揭曉----錢作怪。

呢個Po係先頭部隊，鋪定路俾今日出街嘅「相逢何必曾Big Mac」

(編按：蘋果日報今日講，蔣先生出席老麥活動，有唱呢首歌同埋重Rap當年的經典廣告，咁仲唔係不謀而合？

同樣玩懷舊，仲要都係老麥，加埋蔣志光，喂，世事有冇咁巧合呀？

個人覺得，確係有點noise，假如早幾個月出，拍埋《老表你好hea》的《相逢何必曾燒衣》一齊出，效果會更好。

始終，網友創作同商業運作有所不同，但凡商業策劃，總花較多時間，成品出街之時，分分鐘變明日黃花，無法子嘅，你諗吓，淨係傾首歌個版權都起碼搞兩個星期，仲要扮八十年代MV，快極有個譜。

其實近年老麥喺廣告手法都進取咗，譬如之前夾埋港視《警界線》推「點Jack」都係令人眼前一亮之作。

客戶肯試新嘢，無論Agency定觀眾都會拍掌，仲要咩media都唔介意喎，你諗吓：港視、100毛，都被現屆政府視為充滿「敵我矛盾」的傳媒，喺連《am730》都要「被抽稿」嘅年代，老麥唔聽「方丈」枝笛，唔睇「政策市」，單憑「自由市場」的因素決定做乜嘢、出邊度，真正「在商言商」，呢啲掌聲，畀得過。

作者：LJ

原文刊於廣告狂人fb，文章獲授權轉載。相片來源: 麥當勞