拼搏一年 得到嘅係一句：「Good Job！」

今日Wtsapp Group傳嚟阿May 嘅一句：「今年公司成績唔錯，老闆讚我Good Job 呀！Yeah！」

件事睇落好高興，但老死阿水就挑通眼眉，一句得埋去：「Then？升職？」

阿May答：「無呀。」

阿水再問：「加薪？」

阿May回覆速度減慢：「都無...」

阿水又一句：「花紅？」

過咗一分鐘，阿May已經唔想答，就咁打一個字：「無」

「哦。咁嗰句good job 有咩用？」阿水作出致命一擊。

同Group嘅阿強、阿真同我都唔敢出聲，但同時都心諗：「係喎，句Good Job有咩用呢？」可惜，香港打工仔，日搏夜搏，得到嘅可能就只係一句「Good Job!」真係多謝晒...

辛苦完一輪，職無升、人工無加、花紅分俾大家，咁「做得好」同「做得差」又有咩分別呢？

可能就係一句「Good Job」同「Bad Job」嘅差異啦！咁我寧願要「Bad Job」啦，真係成年做塊「Backdrop」，日日準時走人，做下人肉展板，唔使突出又順眼，儲下大假等收爐，幾完美？

依個時候，阿May不是味兒，嚟個反撃：「唔係咩都睇錢嘅。」好明顯，阿May已經In a relationship with公司。

阿水唔忍啦，佢要爆啦：

打工本來就係一種交易，仲係錢銀交易。你俾錢買我勞力，冇問題，但如果我做到曉飛你都唔俾多啲我，就係我underpaid。

「大部份工都係跟依個原理，所以一間公司12個月糧無bonus無commission嘅話，員工一樣唔會賣命。依啲唔係市儈，係公平交易。點解你要求我做多啲，但你又唔俾多啲？」

聽到依道，阿強同阿真已經開始流出熱淚，身同感受。

不過阿May仲係有疑問：「成就感呢？」

「頂你！成就感？成就感等你過咗入息中位數先講啦，中位數都未到講咩成就感？」阿水講嘢已經直接到痴Q咗線。

佢再補充：「你要喺工作搵成就，麻煩你有返一定程度嘅收入水平先。有水平即係職位有層次，咁你嘅成績先叫成就。香港地，打工仔對人工嘅要求，唔係貪唔貪，而係夠唔夠。」

「一個月一萬幾千，夠你交租定夠你食飯？過一次媽媽節你都糧尾啦。」

太絕。阿May已經徹底沉沒，唯有放低一句：「咁睇自己份工好辛苦。」阿水打出最後一句：「唔辛苦，只求公道。無要你有咩心計，只不過講義氣，都要保障自己。」

群內十人，個個都「輸入中」，想反駁；但最後無人按「發送」，因為駁唔到。正正係大家都知阿水嗰一套係最現實嘅社會應用方法。而「現實」只有一個缺點，就係殘酷。

再者，阿水可以將咁現實嘅思想套入社會上，所以佢係職場嘅組別，就係叫「勝利組」。

同公司談戀愛，係一場極度浪漫但必然悲劇收場嘅史詩式喜劇。浪漫只因你不計代價；悲劇全為你一無所得；喜劇代表當你望返轉頭嗰時，先發現件事實在太過好笑。

全文刊於張晨fb，文章獲授權轉載。