非洲鼓小朋友16年後的自白

在畢業典禮台上接過香港大學校長的畢業證書，21歲的我今日終於以1st Hons成績大學畢業！GPA長期有3.8或以上的我，未畢業已經手握幾份offer，投行人人爭住搶。

我望望畢業典禮台下的媽咪，她眼泛淚光，那種由心而發的喜悅感在臉上表露無遺。依個笑容令我有一種熟悉的感覺。

噢，忘了自我介紹。無錯，我就是16年前小一派位，成功入讀喇沙小學，人稱「非洲鼓小朋友」，而我媽咪就是當時報紙標題所稱的「現代孟母」。

▲ (相片來源: 蘋果動新聞截圖)

還記得當年新聞一出，網民隨即瘋傳我與媽咪的訪問片段，我只是輕輕一按眉心，大家即時指責媽咪將我迫得太緊，又話媽咪怪獸家長上身。

童年？咩嚟架？食得架？當日一班享樂主義者批評媽咪迫我返興趣班，爭入名校，令我失去快樂的童年。

16年來，你們自以為很明白我？嘿，我只好贈你們一句「別人笑我媽咪太瘋癲，我笑他人看不穿！」沒有當日媽咪的英明部署，哪可以成就今日的我？

爭入名校有何問題？今日我電話聯絡人入面，不是上市集團繼承人，都至少是年紀輕輕已經成功創業的同學仔。

再望望未搬屋前的鄰居、自細讀屋邨小學那個阿強，電話薄入面的朋友文員仔一大堆，好多人甚至連工都未搵到。今朝阿強打比我，問我公司請不請人。所以，你們明白出外靠朋友的道理嗎？人脈是多重要！

我知，你們笑我當年學非洲鼓，但全靠當年媽咪迫我學非洲鼓，迫我考了TTM非洲鼓考級試。中學起我已經可以教人打非洲鼓，一堂一人學費盛惠至少300元，學費不算多，但至少不用同人鬥低價、頂爛市。

鋼琴、小提琴老師通街都有，非洲鼓老師去邊搵？

當年一星期返興趣班返足七日好辛苦，學完非洲鼓還要趕頭趕命學奧數，10點回到家還要與一大堆功課惡鬥至凌晨，搞到我當年黑眼圈、眼袋大到嚇死人。現在回想起來，都覺得是非人生活！

不過，這一切都是值得！16年來每逢過時過節，最愛用仔女成績曬命的三姑六婆未開聲問，媽咪已經可以好自豪地說：「佢讀喇小」、「佢讀喇沙」。

你們畢業就等於失業，媽媽除了擔心就只有憂心，但我媽咪不同，當年可能被香港網民笑幾日，但往後16年從來都沒有擔心過我。

（心中暗想：撇除升中一那年，等派位那天早上媽咪緊張到呼吸困難，幾乎暈倒！）

成日話每個成功人士背後都要有一個好女人，那個女人一定是會迫你返興趣班，不准你打機睇卡通片，過時過節要留在家做補充練習，不可以與同學仔出街玩的媽媽。

阿媽永遠是世界上最強的女人，她們「算到盡」，為左個仔入名校，會在所不惜去信耶穌、報假地址、甚至放低佢地最愛的Hermes包包，去學校做校工， 佢地覺唔覺得自己慘? 佢地會反問你一句「so what!」

所以佢地會迫仔女一星期上10個興趣班，做功課到凌晨，仔女好辛苦? 佢地都會答﹕「so what!」

如果你有一個這樣的媽媽，恭喜你，你的人生已經成功一半！

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。