滙豐紀念鈔改期領鈔必知5件事

滙豐紀念鈔今日（ 6月9日）首天領鈔，如灣仔會展及九龍灣展貿領鈔地點均出現超長人龍排隊領取匯豐紀念鈔，九展人龍更排到去附近的工廠區。

ezone.hk 記者就排隊多個小時才成功取鈔！天氣酷熱，而且時間都係金錢，究竟可唔可以改期領鈔呢？根據滙豐 150 週年紀念鈔官方網頁指出：

申請人如未能於指定日期／時間／地點親自領取紀念鈔套裝，則會喪失領取獲分配紀念鈔套裝的權利。

不過，滙豐銀行作為大機構，都唔希望出現公關災難，ezone.hk 致電熱線查詢，確認所有成功認購滙豐紀念鈔的市民，只要致電 2880 0180 熱線，即可向客戶服務員登記，安排延期領鈔。以下係改期領鈔必知的4件事，即睇！

1. 致電熱線改期   7 月補領！

雖然滙豐 150 週年紀念鈔官方網頁講到明不得改期，但如今大會安排混亂，政策要變都係正路。想改期，可以致電匯豐紀念鈔客戶查詢熱線 2880 0180。

記者以「成功認購者」身份致電熱線，接通至客戶服務員後，說明要改期領鈔，對方要求記者講出身份證頭 5 位數字及登記電話後，便告知「成功登記改期」。

改期後，最快要等到 7 月才可領鈔，滙豐會有職員於 6 月尾以電話告知新的領鈔地點、日期及時間。

2. 改期後   改變主意按時領鈔？

雖然今日超多人排隊領鈔，但唔排除明天、後天的情況會有所改善。萬一今天登記「改期」，明天又想改變主意「按時領鈔」，可以嗎？滙豐銀行客戶服務專員指出，咁樣做係可以的！

3. 蛇王失敗   放工領鈔可以嗎？

搵食艱難，如果老細抽唔中紀念鈔，而你又想同老細講「想出一出去 3 粒鐘領鈔」，隨時俾葡萄老細拍檯叫走！無法在上午或下午蛇王點算好？

滙豐銀行客戶服務專員提供貼士，話只要在領鈔日期當日的 9pm 前去領鈔即可。無得蛇王，放工先去啦！

4. 唔要喇！有無得退款？

領鈔要排隊，改期又要打熱線登記（記者打咗 9 次先成功接通），我秒秒鐘幾百萬，如果放棄紀念鈔，退款又得唔得？得！不過，你仍然係要打熱線登記！

滙豐紀念鈔熱線客戶服務員表示，想退款係無問題，不過最快要等到 7 月先有退款詳情。呢一刻都係幫你做登記，遲些少會有電話通知安排退款。

5. 小心！炒價隨時跌！

如果你係打算即時放售紀念鈔圖利，要留意回收價每小時在變，愈遲放售，可能回收價會愈低。改期領鈔，最快要等到 7 月先有得領鈔，屆時回收價有幾多，真係問丁蟹都未必知！不過，學《大時代》八字金句「咁多人死唔見你死」，個個睇佢跌，話唔定遲一陣會升呢！

原文刊於ezone.hk