滙豐紀念鈔7個反彈的理由

滙豐紀念鈔回收價持續插水，但金輝錢幣郵票公司負責人陳榮輝卻大唱反調，且看他睇好後市看升的 7 個理據：

1.內地做緊 $900 多

內地錢幣買賣市場，滙豐紀念鈔個價，號碼沒有 4 或 7 的，做緊 $900 多。

2. 排長龍情緒失控

滙豐安排不善，市民怨聲載道，唔排除內地買家利用市民想盡快甩身的心態，團結起來乘機壓價。佢哋見壓到低於 $600 都有人肯放，當然食住上。

我的買家出價 $750 同我收，我用 $680 接市民的貨。雖然賺少啲，但有貨交俾內地買家；在九展或會展門外那些散客，他們個價咁低，可能收唔夠貨，冇貨俾人（內地買家），最終咪又要提升番個回收價。

3. 內地買家初盤是 $800 多

原本內地買家願開 $800 接收單張，見開市 $1000 所以不收。於是個價不斷下滑。

4. 內地市場仍在炒郵票

滙豐紀念鈔回收價持續低迷的其中一個理由，是內地市場仍在熱炒郵票，滙豐紀念鈔未起。現在滙豐紀念鈔正式領鈔，在郵票市場的資金將慢慢流向滙豐紀念鈔，而且我知道想要滙豐紀念鈔的內地買家已經開始增多，越來越多人向本地同行要貨，後市需求將會更大。

5. 運輸問題只是借口

我一早都話 35 連張市道不好，一來本地市民只是「順手剔埋」，二來內地送禮熱潮退卻，所以「運輸問題」只是壓價的借口！如果內地有需求，買家無所不用其極都要把 35 連張運上去啦！

解決運輸問題其實不難，只要內地有需求，我估最有可能的做法，就是棄掉巨大的包裝盒，其實內地收藏家根本唔志在包裝盒，我之前好多中銀、渣打、奧運紀念鈔，全部包裝盒丟掉，照樣有人接貨，內地收藏家只在乎塊「肉」（紀念鈔）。

6. cut 單鈔賣

我唔係唔收 35 連張，我只係唔想 keep 貨令資金被困。所以我要有買家，我才回收。有趣的是，這兩天有本地買家想要 35 連張，他們是真正收藏家，但抽不中，現在見個價低水，自然願意入貨。佢又開心，我又開心，皆大歡喜。真實例子，我用 $25,000 回收一套 35 連張，再用 $28,000 放售，兩個價都係靚價好意頭，大家開心。放俾內地，只可賺 $1,500 咋。

至於內地，35 連張未炒起，但單張是有需求的。不排除有人會把 35 連張 cut 鈔賣買，你計計數，如果單鈔可以每張 $1,000，35 連張只做到 $20,000 餘，cut 鈔放俾內地買家，是否利潤更大？但要小心，cut 得唔好，可能唔收的。

7. 中銀渣打價回升

內地中銀和渣打紀念鈔的回收價正在回升，這是重要指標。點解升？因為內地禮品公司打算把中銀、渣打、滙豐變成一個禮品套裝，所以他們開始吸納中銀渣打，導致回收價看升。

當他們收夠中銀渣打，尚欠滙豐紀念鈔才能組成一套三間銀行的紀念鈔禮品套裝，那麼滙豐紀念鈔點會唔升？升幾多？我認為 $1,000 左右是合理，你話網上有人開 $2,000，但有冇成交先？你們正式交收的時候，他們肯肯定諸多理由壓價，當然也不排除好價交收，前提是你要有靚冧把。

全文刊於ezone.hk