「華麗轉身」一個唔小心 錯手投錯票

City 16:42 2015/06/17

分享:

政改方案表決在即,一班泛民議員實牙實齒,講到明一定會否決政改方案,絕不「袋住先」。

如果今次要通過政改方案,要經立法會全體議員(70人)三分之二多數通過(即47票贊成票),如果有議員缺席,都作棄權票論。

阿潮計過,目前泛民的27名議員表態必投反對票,大家以為政改一定會遭否決? 正所謂「凡事太盡,緣分誓必早盡」,如果泛民來一個阿姐「華麗轉身」,政改隨時通過,天啊,典解既? 到時咪話Sorry 投錯票,到時咪可以順得哥情,又不會失嫂意囉。

阿潮為各位泛民議員諗過度過,轉投棄權票,同樣可以否決政改方案,但就不會投反對票「太進擊」。

相片來源:本報資料室

突然諗起DO姐的廣告口號:「意外,就係意料之外!」無錯,人生總會發生好多美麗的意外,冇端端就投了「棄權票」:

1. Sorry 投錯票

哎呀,唔小心投錯票,下次會小心啲!

手指明明準備投「反對」,行為卻好誠實,一個唔覺意,就投了「棄權」。典解嘅?典解嘅?

相片來源:黃碧雲fb

2012年11月9日,同屬公民黨的梁家傑動議,就前行會成員林奮強賣樓事件進行休會辯論。黃碧雲投錯棄權票,結果贊成與反對票數同為29票,最後內務委員會主席梁君彥按議事規則投下決定性的反對票,否決進行休會辯論的動議,黃碧雲被網民質疑「放生」林奮強。

無錯,人誰無過,下次小心啲囉。

相片來源:黃碧雲fb

2. 主席,議員瞓咗,唔知有冇生命危險!

70名議員,逐個發言,內容又重提8.31決定,2017一定得,拒絕假普選等等又真係好悶,效力隨時勁過安眠藥,一聽就昏迷,到時不知醒投票又可以怨邊個?

不要以為我講得好誇張,2012年5月10日,立法會審議替補機制議案時遇上議員拉布, 立法會議員黃定光在座位熟睡,立法會議員梁國雄隨即關心黃定光有沒有生命危險。

瞓咗,當然投不到票。事後仲可以用高登仔恥笑球賽比數mode講句:

瞓咗冇睇,建制派有幾多贊成票?

3. 掛住睇iPad 唔記得噤掣

開會開到悶悶地,拎個iPad玩玩打發時間係唔錯選擇。

民主黨議員何俊仁去年在財爺宣讀預算案期間,就自稱「係會議上分咗心」加上「可能因為近排有啲攰」,就花咗半小時在iPad瀏覽多張身穿性感比堅尼泳衣的女性照片。

相片來源:本報資料室

如果有議員在今次政改投票時掛住睇相,隨時真係會錯過投票的時間!

其實阿潮還諗到好多個意外,例如睇錯開會時間、塞車跑得太慢來不及表決、食錯嘢攪突然肚痛、冇食早餐血糖過低暈低,又或者好似湯家驊今日行入議會廳「眼濕濕」,可能係投票過程太傷人而唔記得噤掣。

不過,依啲通通都是阿潮小人之心,究竟政改方案最後通過還是否決?大家拭目以待!

撰文:潮人

我叫阿潮,係一個人,來自潮洲。低調啲可以叫阿潮,俾面就叫聲潮人,鍾意寫潮文,香港發生咩事我都寫,潮文乜乜乜。

撰文 : 潮人