最怕豬一樣的隊友

City 16:56 2015/06/18

分享:

相片來源:《大內密探零零發》截圖

政改方案遭否決,最令人意想不到的劇情,竟然建制派33位「烈士」拉隊離場,一心要拖延投票時間,希望等埋立法會議員劉皇發發叔到場,一起投下歷史性的一票。

當時一直睇緊表決直播的阿潮,終於明白不怕神一樣的對手,最怕豬一樣的隊友!竟然有「建制8俠」沒有離場,依然留在議事廳內投票,最後出現只有8票贊成票的爆笑局面。

今次建制派認真曳曳豬,沒有做好議員的本份,拉隊離場、發叔又遲到,甚至盤算拖延投票時間,表現完全唔合格!

特首梁振英及建制派曾多次強烈譴責拉布、拉隊離開會議廳的不負責任行為,好,就等我阿潮度返幾句「對白」:

1. 認住依班議員!

立法會今年2月討論開設設立創新及科技局的撥款申請時,曾遇立法會議員拉布,當時特首梁振英表示:

開電視睇直播,可以一個一個認到呢啲議員,係啲乜嘢議員,佢哋會用拉布的手法,拖延甚至令到創新及科技局胎死腹中。

今次政改方案留下8票贊成,28票反對歷史性紀錄,相信阿爺同CY真係激到上心口,學CY話齋﹕「開電視睇直播,可以一個一個認到呢啲議員,係啲乜嘢議員。」

2. 下屆立法會選舉要「票債票償」!

立法會議員的職責是甚麼?就是要代表選民,投下神聖一票,如實反映選民的意向。

今次建制派議員拉隊離場,放棄投票的權利,擺明就是背棄選民,正如愛港之聲主席高達斌所講一樣:

議員準備下屆區議會及立法會選舉中「票債票償」!

作為藍色陣營,雖然政改最終遭否決,但起碼要死得轟烈,起碼有42票贊成紀錄,依家建制派只得8票,點向選民交待先,仲要做一場大龍鳳,又話發叔遲到,又話溝通唔好,結果真係令人O晒咀,「票債票償」係咪要同建制派講先。

3. 有票,真係唔要?

相片來源:政府宣傳廣告

有票,真係唔要?有得投票,點解唔投住先?一日未知結果,建制派議員都不可以放棄自己重要的一票,因為永遠不知道邊位泛民議員會「華麗轉身」,改投贊成票。

政府的「有票 真係唔要?」應該在表決前向建制派講清楚。依家「華麗轉身」變成建制派!

4. 交通擠塞唔係遲到理由!

雖然,發叔由新界去到立法會路程好遙遠,但學立法會主席曾鈺成話齋:

交通情況不是第一天出現,議員應有充份估計!

聽聞發叔唔舒服,所以遲到開會。至於你信不信?反正我信了!

但阿潮最唔明就係嫻姐,雖然嫻姐為左懷仔單嘢搞到一身蟻,但作為建制派中堅份子,一定會隨工聯會拉隊離場,但唔明隊友點解唔叫埋嫻姐走人? 今次嫻姐認真黑仔。

8位議員留低在議事廳,究竟發生甚麼事?陳婉嫻、林大輝、陳健波都稱「唔知發生咩事」,陳婉嫻向有線記者稱:

我真係當時唔知(發生甚麼事),我心入面就話要投依一票,依一票好重要,就咁樣。(有冇同黨友溝通?)當時冇時間。

林大輝則稱,看見葉國謙跟其他建制派議員突然起身時,他與陳健波都不知道發生甚麼事,加上當時曾鈺成催促要投票,於是在歷史性、關鍵性一刻要先投票才離開。

陳健波就話,當其他議員起身時他「都唔知做乜」,自己因堅決支持政改,所以必先投票。

今次政改表決真係花生戲,不過政改否決,阿潮都忍唔住Yeah左一聲,拒絕「袋住先」。

撰文:潮人

我叫阿潮,係一個人,來自潮洲。低調啲可以叫阿潮,俾面就叫聲潮人,鍾意寫潮文,香港發生咩事我都寫,潮文乜乜乜。

撰文 : 潮人