上司口中美麗的世紀謊言

出來工作轉眼十年，阿潮稱不上是職場老手，但經過那些年，跟過的上司十隻手指都數唔曬，他們性別不同、高矮不一、相貌各異，卻無一例外擁有共通點——喜歡對下屬講美麗的謊言。

謊言是美麗的？對啊！上司的說話能不花氣力，就可以為你注入工作助燃劑，順帶可以加重你的工作負擔，到頭來你卻一無所有。

以下4句說話，阿潮已經聽到厭，比「狼來了」更甚：

1. 比心機，我睇好你架！

屈指一數，阿潮都轉過十間八間公司，呢句說話的覆蓋範圍拍得上wifi，無論是跨國集團、上市公司，或者私人企業，都例必會聽到。

阿潮最憎就是聼到呢句說話，皆因是「伏」，往往「比心機，我睇好你架！」嘅話音未落，上司轉頭已經將大曡「豬頭骨」文件放在桌面，被餵食蜜糖的你能拒絕嗎？

即使你明知做得好唔會有獎賞，你都要硬着頭皮，捱幾晚通宵在限期前完成交給上司，再換取一句「Good Job」！你真係以為上司睇得起你，咪傻喇！難道你以為他會將自己個職位，拱手相讓給你嗎？

2. 我會幫你爭取加多D人工？

每年臨近做Performance Appraisal，又是吃「豬頭骨」的高峰期。

上司總會叫你入房傾下計，「慈母」上身回顧你過去一年的表現，苦口婆心地分析你的不足之處，然後再讚下你的過人之處，最後再加多句：「我會幫你爭取加多D人工喇！」

阿潮仍然記得初出茅廬踏入職場那年，被叫入房那刻戰戰兢兢，聽完上司的訓話後，突然聽到呢句話從惡到死的上司口中講出來，內心真是好似打咗興奮劑，好想大叫一聲「阿媽，我得咗喇！」覺得自己的努力終於有收穫，更加相信努力便會有回報。

自踏出上司房間的那刻，阿潮全身充滿正能量，立即埋頭苦幹，那股幹勁真是老虎都可以打死兩、三隻，甚至連「豬頭骨」都吃得津津有味，可想而知這句說話的影響力有多大。

結果是點？阿潮只想感嘆一句：太傻太天真。

3. 今次人工加得最多係你，記住咪同其他同事講。

終於等到派加薪信了，阿潮深信上司會履行「我會幫你爭取加多D人工喇！」的承諾，事前已經同女朋友BB豬講好，會立即買個PRADA手袋送俾她，分享下加薪的喜歡。

當我滿懷希望再次踏入上司的房間，從上司手中接過那封印上「private & confidential」的信件，準備華麗轉身起身離開時，上司忽然再陰聲細氣同我講：「今次人工加得最多係你，咪同其他同事講，抵請我吃飯啦！」那刻的我，心情興奮得難以用字眼去形容，唯一想做的就是再大叫一聲，「阿媽，我得咗喇！」

當我極力掩飾發自內心的喜悅，從容地返回自己的座位，掌心早已緊張到出汗，雙手顫抖撕開加薪信時，真的忍不住大叫一聲：「X」！

所謂爭取加多點人工，所謂人工加得最多係我，最終只是加得3舊水，咪話買Prada手袋俾BB豬，最後還要忍着憤怒請上司吃咗餐日本菜，蝕到入肉。

我後來檢討，這完全是上司的「語言僞術」，他說會幫我爭取，無講明一定會爭取成功啊！他說加得最多是我，可能其他同事只有200元呢，我又不能逐個同事去對質，薪金畢竟是私隱，當然不能隨便同同事講啦！

4. 依家是比機會你學嘢！

阿潮自問是個捱得打得嘅打工仔，只要是工作範圍內的事，永遠不會托上司手踭。總會有些上司，強行將無人肯吃的「豬頭骨」塞過來，美其名：「依家是比機會你學嘢啊，好易做遮！」

嘩，真是多謝晒喇！如果是能力範圍以內的，做多點其實真的唔緊要，往往那些「豬頭骨」真是啃死人，吃到你嘔泡，最後可能還要碌爆張人情卡，真是要講句：「寧願相信世上有鬼，都唔好相信上司張嘴」。

職場上打滾，能相信的只有你自己，上司那些謊言總是美麗的，殺傷力強勁，總之你要記住半澤直樹的名言：「下屬的功勞歸上司所有，上司的過錯是下屬的責任」。

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。