鄭丹瑞：奴性累事

一次莊嚴無比的投票，它的結果將會決定香港未來政制的路向，誰又會估計最後是鬧劇一場！坊間即時反應是「樣衰」、「豬一般的隊友」、「蝦碌」、「沒有最爛，只有更爛」、「一盤散沙」、「愚蠢」來形容「等埋發叔」事件。

但係我覺得佢哋講漏咗一樣。

好事之徒說：

奴性重，係今次建制派搞到一鑊泡嘅原因。無端端喺重要關鍵時刻走出議事廳，已經極不尋常；你班友問都唔問一句，人哋叫你行，你就行，人哋叫你等埋發叔，你就出去周圍同人講要等埋發叔，人哋話唔夠人數，你就以為真係唔夠人數；阿頭講乜，你哋照單全收，成件事無用過自己個腦去分析。

不過，亦好難怪佢哋無用腦思考分析，加入呢個陣營第一日開始，已經預咗一切都係聽從指示！咁多年來都係聽柯打做嘢，習慣晒唔使諗，忽然間要喺五分鐘之內決定留喺位定行出去；呢一刻，慣性發揮最大功效，一於跟大隊就無死錯人！咪就係咁，鬧出個天大笑話囉！

問題係，呢個笑話係我哋香港人覺得好笑、國際媒體覺得好笑咋噃；阿爺真係唧都唔笑！任你特首如何補鑊維護建制派，但在這個政改議題上，本來係四十一票支持對二十八票反對嘅，而家忽然得番八票支持，幾無面呀！建制派等住阿爺秋後算帳都得喇！

好事之徒不是危言聳聽，好戲在後頭呢！

全文刊於《經濟日報》收費閲讀。