荔園集體回憶經濟學

幽默大師周星馳，由細到大日日朝頭早都玩過山車，晏晝又玩海盜船，亦都會朝頭早玩海盜船，晏晝先玩過山車，黃昏再玩多次海盜船。

簡直教壞晒啲小朋友，如果現今有人咁做，一定破產！

香港人有很多集體回憶，亦有很多人用「回憶」來賺錢。闊別18年的荔園在中環重開，本來以為可以回味一下童年回憶，怎料價錢貴到嚇死人，玩一次碰碰車要60蚊，跟以前完全唔似樣的恐龍屋也要40元。

哪有錢啊？

荔園在1997年結業當晚，入場費亦只需10元，小童半價5元。事隔十八年，除了個名一樣叫「荔園」之外，園內面目全非，當年入場費亦只夠我掟一次階磚換白箭黃箭。老實講，荔園喎，誰不想回憶啊？就算是未入過場的，相信父母也想帶小孩見識一下，以前老豆阿媽玩的機動遊戲，有幾咁old school，不過…又唔抵得畀你呃錢咁解姐。

此外，街頭小吃在香港也幾乎絕種，我最喜歡吃的糖蔥餅已越來越少見，僅存的一檔在油麻地地鐵站行去潮流特區方向的巷仔，會有個賣糖蔥餅的伯伯，又平又好食，每次幫襯都見他很有中氣地跟客人聊天。有次跟他聊了幾句，伯伯霸氣地說：

我都想退休唔做啊！但唔做邊個做？

其實…還有很多人會做，每年維園搞的乜乜節物物節，一定會看到「懷舊美食：糖蔥餅」，但售價卻不是每個人都回憶得起。

問題出在哪？唔洗問一定係土地供應問題！的確係，租金瘋狂加，賣五蚊串魚蛋或十蚊雞蛋仔，哪有錢交租啊？

於是很多香港的特色小食，只剩下遊客跟自由行會買來吃。而香港人只會一窩蜂跑去吃韓國、日本、台灣等其他國家的老翻小食。

除了土地問題，說穿了香港人是「製造回憶」的幫兇。

以香港人什麼也貪新鮮的特性，雪糕插舊雞蛋仔或者蜂巢，賣八十蚊日日排晒長龍。在網上見過一間日式火鍋，加舊用白沙糖轉出黎的綿花糖，遇熱即溶，一群港女高興得拍手歡呼「巧打耳吖～～」。

只要感覺新潮，香港人就會捨得掏錢排隊蜂擁而上，幾個月後，才覺悟到原來雞蛋仔跟雪糕分開食才最好味，原來灑堆沙糖落湯就大叫打耳嘅自己先係最打耳…

當你發現清水才最耐看的時候，傳統的東西已經捱不住貴租執笠了，又一樣東西「被製造」成回憶，消失幾年後又被人拎返出黎，抬高幾倍價錢賣「回憶」，這盤生意就是這樣運作的了。

原文刊於作者藍橘子fb專頁，獲作者授權轉載。原文無題，標題由TOPick 編輯擬。