記者就是窮？11個不跟男記者交往的理由

近日網絡上流傳一篇《11個跟女記者交往的理由》的文章，列出與女記者拍拖的好處，包括自由度大、有講不完話題、女友實事求是很講道理等。現實中的記者女友是否真的如此，小編為保性命安全，就不願置評啦。

記者女友或者是不錯的選擇，那記者男友呢？有網民就撰文回應，列出11個不跟男記者拍拖的理由，第1條與第11條，真的要中要害啊！

以下為全文：

《11個不跟男記者交往的理由》

1. 窮

2. 懶有正義感、頭巾氣，看不起錢，缺乏短線財富累積渠道-> 回到（1.)

3. 自以為是：以為自己身處森林就最清楚山，其實連山的外型也不懂，口頭禪是：你識乜呀！我肯定係咁、點解肯定？因為我知！

4. 冇時間：報紙雜誌記者唔洗旨意陪你行街食晚飯，放假在屋企瞓覺，下午4:00前唔好叫醒他，若叫醒咗，他下晝會補睡4小時。

5. 冇情趣：大時大節通常他要返工，唔洗返工都唔會陪你去倒數、睇煙花、行花市......因為：「我返工做到厭啦」。

6. 窮遊：泰國、東南亞係首選：有得hea、乜都平。歐洲南美？冇假，「你想我比人炒呀？」日本？冇錢，「去都得，AA制，自己手袋自己買」、「北海道睇雪？哈爾濱都有雪喎。」

7. 門口狗：對住受訪者、疏士就笑笑口，「哎呀點呀好耐冇見…」，冇停口；對住妳都交下戲架啦，你睇他對屋企人？黑口黑面冇嘢講架！

8. 雙重標準：枝筆就寫人仆街賤格，自已就唔好得好多。自以為彰顯正義，「我呢單新聞好重要」，其實個世界冇左他唔會有任何影響。冇時間陪你，有時間同行家宵夜落club，「傾緊大單野！」（背後有音樂聲「喂…！」線已cut）

9. 經常捱夜（包括蒲），未老先衰（上半身與下半身皆是）。

10. 結婚前預左他會窮，只能默默支持他渴望他成才結果自己心力交瘁

11. 結婚後原來他真係成世都窮，只能公一份婆一份妳幫仔女換緊片他返夜再食宵夜令妳身心俱死。

To：女士：所以，唔好揀男記者
To：男記者：如果咁不幸有個好女仔跟左你，你唔好浪費人青春，飛左她！如果她咁都唔肯離開你…咁你千祈千祈唔好俾她離開喇！而如果你又真係好想她離開…一場行家我幫你頂左她，上述11條我中得7788架。

（P.S. 上述11條不適用於財記及管理層的上大人）

文章獲作者授權轉載。