荔園老闆邱達根：唔想3個仔只識迪士尼

過去6月，荔園主席邱達根（Duncan）每周總有幾日，留在新荔園現場監工，看著這塊2萬多平方米的中環靚地，建起掛上霓虹燈牌的荔園城堡，10米高的恐龍屋落戶。昔日坐落在美孚的荔園遊樂場，結業18年後在中環海旁「復活」。

生意之道：主打「大家都會記得」的遊戲

這10年兩大主題公園迪士尼樂園和海洋公園鬥得燦爛，擴建工程進行得如火如荼，Duncan卻大唱反調，他認為再用遊戲硬件作賣點，「已經好過時」。

半年前他開始籌劃重現荔園，做的第一件事，是主動找本地公司合作，為遊樂場的經典遊戲注入香港元素：

大家咩遊戲都玩過晒，傳統靠Hardware（硬件）成功已過時。好似咖啡杯，個個遊樂場都有啦，不如來個Crossover同翠華合作，成件事會幾好玩；坐小火車時，其實擺交通工具做巴士、電車，可能再過癮，就同城巴新巴去傾。我們公布計劃後，外國牌子如Microsoft都有搵我們合作。

以新荔園的發展規模，要做大挑戰兩大樂園巨頭歌利亞，有如天方夜譚，但Duncan認為香港容納多一、兩間主題公園，「絕對有空間」。以新荔園為例，主要目標是香港客人，跟無論經濟好壞都遊人如鯽的兩大樂園，構不上直接競爭：

我自己都係3個小朋友（分別1歲半、6歲及9歲）的爸爸，其實香港真係無咩俾小朋友好玩的地方，有時一些短期騷或玩意來香港，家庭客都湧晒去玩。我覺得市場絕對容得下。

我們（荔園）唔係迪士尼賣機動遊戲、見王子公主超級英雄，我們比較Earthy（樸實）、人性一點，接近本地人真實生活，係玩大家都會記得的遊戲。

▲ 相片來源：iMoney智富雜誌

邱達根：7千萬投資回本機會微乎其微

叮叮船、碰碰車等，九十後、千禧後未必認識，但都是幾代香港人在荔園的集體回憶，Duncan很期待開幕後，香港人帶著一家大小到遊樂場玩，重新認識這些仍不過時的機動遊戲。

新荔園雖然免費入場，但個別遊戲的收費並不便宜，最貴的鬼屋入場費要80元，玩一轉碰碰車碰撞一下，13歲以上的遊客就要付60元。

Duncan稱，這個定價已算合理：

當每人預200元玩，唔係用全部錢玩最貴（的遊戲），都玩到好多嘢，和睇場戲的價錢相若，宜家入戲院買埋爆谷汽水，都要100多元。有人話舊荔園咁平，你就收得咁貴，但兩條數計法唔同。以前買遊戲設施會用十多二十年，我現在只做兩個月。鬼屋我收80元，但成本用了不少在AV技術和App，全程爆滿我都收唔番本。

▲ 41歲的邱達根，就是帶著這股傻氣，豪擲7千萬元籌建新荔園。（相片來源：iMoney智富雜誌）

單是興建鬼屋成本已四、五百萬元，經營戶外遊樂場，總是「好天曬，落雨淋」，要扣除打風落雨和平日少客的日子，加上新荔園是限定日子經營，所有成本都靠70日收入，他直言「條數好難計」。Duncan並直言在龐大開支下，無可能複製到舊荔園的賺錢方程式：

有人講過以前舊荔園擲香口膠最賺錢，因為條數計落投資最少，但Keep住有人排隊玩；海盜船、宇宙船新買番來，好多人排隊爆了一輪，但就要慢慢等（回本）。今次搭建成本好貴，但拆咗就冇，下次要重新計過，得巴士、咖啡杯等遊戲可重用，計法又變得好不同。

他預計整個嘉年華期間，約有100萬人次入場，但收入多少就難以猜測：「可能大家只是來影相，唔玩都唔奇。」20多歲已成為上市公司主席的Duncan，自言心中有數，7千萬投資回本機會可能微乎其微。

出售家族公司 套現2億經營荔園

新荔園找到永久園址、可以長期營運當然最理想，但Duncan覺得未必做到：

長遠我都有諗過搵地去做（建荔園），但做一個永久場唔容易，要諗長期如何營運、定位、有無經濟效益，更多事要考慮。搵番荔園個Brand出來，我都唔想做衰佢。

新荔園才剛開幕，他已打算明年容許的話，會繼續覓地經營短期遊樂場。這幾年本土懷舊意識抬頭，他認為是重推荔園品牌的黃金時機，同時也是刻不容緩的使命：

宜家唔攞（荔園品牌），過10年、8年，可能就無這個（懷舊）情緒，識荔園的人年紀都大了，下一代來追憶的理由更加弱。你可以當它是娛樂、一個遊樂場、一種回憶……但我要拎番荔園出來，給大家認識這個香港舊品牌。

上月他出售家族公司遠東控股國際（00036）約1.63多億股，套現2億元。不再是公司主要股東的他，現在一邊繼續揀蟀投資IT企業，一邊經營荔園公司。他說開幕後將視乎反應，再決定下一步路向：

宜家兩條腿走路，荔園公司主打係遊樂場，亦不排除做其他娛樂文化，如手機遊戲。荔園出到來，大家會否不認可文化和氣氛，我真係唔知，但做生意要好像做internet般，要很快跟得上社會潮流改變，否則，可能下星期就會消失。

▲ 相片來源：iMoney智富雜誌

「唔想3個仔只識迪士尼」

Duncan爸爸邱德根早年接受訪問時，不時提到要重開荔園。幾年前兩父子開始物色合適地點，去年尾終扑鎚選址中環新海濱。今年3月邱老意外過身，成為Duncan心中的遺憾：

無諗過爸爸突然離開，以為他可以睇到荔園重生。荔園唔係出面所講，是（爸爸過身）之後才做的事，而是一路都想。

難忘父親教曉他感恩

Duncan憶起爸爸，最佩服是他獨到的商業眼光：

冇人做嘅佢率先做，好似新界冇人開戲院銀行，佢去開，遊樂場之前冇人賺過錢，佢又去做。

在六、七十年代，以荔園為首的主題遊樂場，以及巴士、小輪公司，被譽為三大最賺錢行業，那些年荔園每年入場人次高達300萬，幾乎是當時全港人口數目：

記得爸爸當時成日同我講，當然係有重複來的客，但那時邊有外國遊客，主要都是香港人，所以本地人係來得幾誇張。

小時候Duncan已經常隨爸爸巡荔園，30多年後新荔園開幕前，他都有帶兒子到現場，要他們看到工人連夜搭建的辛勞，既是傳承，也要教曉下一代感恩，雖然公園只開兩個月，但背後靠許多人的努力和合作才做到：

現在小朋友娛樂有一堆選擇，唔似六、七十年代，有得玩的歡樂是得來不易：那時如果住港島去荔園，夏天搭巴士要焗熱狗巴兩粒鐘，和搭飛機去台灣差唔多，但幾辛苦都想搭車入來。爸爸以前帶我睇荔園，都是想教我，唔好只睇個製成品，玩還玩都要了解公園背後，每個人係點做事。

▲ 童心未泯的邱達根，在恐龍屋前扮哥斯拉時像個大男孩。開幕前他都有帶兒子到現場：「爸爸以前帶我睇荔園，都是想教我唔好只是睇製成品，玩都要了解背後的人工作辛勞。」（相片來源：iMoney智富雜誌）

冀與子分享兒時回憶

去年佐敦一間以荔園遊戲作主題的餐廳，開幕後大收旺場。Duncan也有聽聞：

我無去過，但我睇到相拎比屋企阿仔睇，佢哋只是『哦』一聲，無感覺。

他和兒子傾計時，間中都會分享兒時玩意和回憶，但講起荔園舊事，仔仔卻「聽唔入耳」，重辦荔園，其實他也有一點點私心：

我話爺爺有個遊樂場，但佢腦入面只有迪士尼，唔會諗到有個好本土的遊樂場。好似我們講以前的卡通片，佢未睇過就講100次都無感覺。自己自私一點，如果可以將細個睇同玩嘅嘢，傳給下一代，都幾有意義。

今年3月邱德根過身後，Duncan哥哥邱達昌4月聯同何超瓊等人申請免費電視牌照，近日他亦高調為荔園宣傳，外界質疑他們是不是有心編排，他澄清：

這個是巧合，大家兄弟都係各自做番、延續番家族的東西，但somehow好似同一個時間發生，撞埋一齊，我覺得好natural（自然）。

全文刊於《iMoney智富雜誌》第401期（收費閲讀）

iMoney智富雜誌facebook