【潮文】港股大冧市 阿信屋幫到你？

今日一早瞓醒見到港股又急瀉，跌幅隨即擴大至逾1,200點，我媽呀，我阿潮前日仲入左隻388，點知一入即出事，同事當然安慰我，不過今日同事們愁雲慘霧，大家無晒心機，不停芒實部手機，左邊耳聽到「939得返6.5」、右邊耳又聽到「x，港交所又跌廿蚊」，不過阿潮也有大半條腿踏入IFC了。

阿潮今日話食晏要揾最平果間乜乜乜，隔離位阿姐問﹕「洗唔洗咁慳，依家係糧頭喎」，我真係有苦自己知。

「每逢彈盡倍思親」的阿潮在股市大冧市日，當然要慳錢返歸黐餐，誰料阿媽在電話傳來一句：「今晚有好多餸，有芝士蟹肉撈辛辣麵、韓國紫菜快熟粉、澳洲羊架刀削麵，仲有洋酒放題。如果食唔夠唔緊要，今個星期六日759仲有大減價。」

沒法子，之前媽子大人在阿信屋掃貨掃得很high，結果就hihi了，一屋都是搶到的蟹貨，最慘絕人寰的是她的八達通是用我的信用卡自動增值，阿潮估計最起碼要捱一個月罐頭同即食面。

不過阿信屋也是值得支持的良心企業，只要老闆說一句減價，結果連自己股價也減了。星期六日還要由777折變成668折，祝大家「路路發」。不過愁眉不展的阿潮心想：「發？等到發叔都不會發啦！我的生發發跌穿200元了！」

其實蟹貨又怎止於股票？阿哥每天對着賣不出的滙豐30連張自拍打卡裝富二代，但實情? 大佬日日問朋友有無興趣接貨，結果無人問，依家還打算剪出來用，認真慘慘豬。

家姐又是「廢青」一名，何解? 因為佢成日去日本旅行買唔到樓，剩下的卡數未清之外，仲大大聲話要學杜如風繼續散錢，叫全家記得睇電視《東京攻略》；我的BB 豬還欠上次買的Running Man 及 Big Bang 門票錢，不知道她會否做「Running Man」走數......

雖然節衣縮食捱下去是不能避免的，不過，若以為不吃不喝或者乾脆跳IFC就能省錢的話可太天真了。還有呎價高昂的骨灰龕位等你供。

面對如此困局，阿潮當然是打不死，大家可以參照阿潮的慳錢大法！現在還要早午餐合起來吃brunch，25蚊4件燒味壽司跟同事一起夾份、到七仔買特價叮飯。跟BB豬二人世界也要五時半前到吉野家吃下午茶當晚飯。

不過我已經按劉鳴煒建議不去日本，連童年回憶的荔園假大笨象、電影恐龍公園和前州長也不看了，為甚麼仍買不到樓？我想請教「大劉仔」......

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。