青春後生就要捱！

近期天氣真係熱到痴線，條街熱到好似火爐一樣，就算坐係到唔郁，啲汗都流個不停。好在，醒目嘅BB豬送咗把芭蕉扇俾我，如果唔係我真係會熱到痴線。

不過天氣熱，都不及屈小姐的言論熱。最捱得的屈小姐自稱「不戴帽不打傘不塗防曬」，「邊行邊吹風扇的行為」亦因為太麻煩而沒做過，仲鬧一班年輕人嬌生慣養，流少少汗都頂唔順，睇死依班年輕人一定不能成大事。

阿潮覺得屈小姐講得好啱喎！咪鬧我住，睇埋落去先：

拎住芭蕉扇的確好煩

天氣已經熱，仲要長期拎住把芭蕉扇，你估唔熱架？汗都流多幾滴啦！所以屈小姐就醒，係屋企永遠都躲在房裏歎冷氣。阿潮點知？屈小姐老公林超榮一年前的《經濟日報》專欄話我知：

星期天，不用上班上學，睡到日上三竿。印傭一早就離家，一屋靜得連一隻蚊都無，因為每一間房都關上門，大家躲在房裏歎冷氣。

如果夏天想降溫，阿潮會學林超榮一家，匿入房開行冷氣，既方便又快捷！

芭蕉扇充電要電費架！

芭蕉扇開最高風速，一、兩個小時就冇電，BB豬炸哂型，阿潮就只好買兩把俾BB豬，輪流俾BB豬用，再加多個外置電，包保BB豬出幾個鐘頭街都可以涼風扇。

不過原來阿潮依個做法真係冇乜腦，你估芭蕉扇充電唔駛電費架？一日差幾次電，真係幾麻煩！屈小姐就醒，據屈小姐一年前係《頭條日報》專欄講：

小女兒學校附近的商場裏有間通利琴行，因為門口有張任人坐的小沙發，於是成了我跟女兒相約等候的「老地方」。 ......總愛選在這沙發等，既可以坐、又有冷氣歎，加上毗鄰通利琴行，不時傳出悠揚音樂，在那裏等人，舒適得很。 

嘩，邊個夠你識歎？又有梳化坐，又有免費冷氣歎，仲有埋古典音樂陶冶性情，依啲咪叫Quality of Life 囉！

你唔係警察？呼吸都是罪！

想反駁年輕人用芭蕉扇唔係唔捱得？你係唔係警察先？

如果你係警察，開工時打個電話返屋企、外出開會路過錶檔順便換電池、順手買海鮮、天氣熱了走得累了吃杯雪糕，如果你係警察，依一切通通都係「人之常情」！

有個年輕人同阿潮講：「宜家80、90後連呼吸都是有罪的！」係呀，依一班青春少艾，有男有女。血氣方剛的年月，流一把汗，是新陳代謝，連熱一點的苦都受不了，將來如何成大事？

不過阿潮又諗唔明，如果我一個年輕人、做警察，條數又點計？

阿潮真心覺得屈小姐講得好啱，嬌生慣養的話怎能做大事？流汗當焗桑拿，中暑練忍耐力不就行嗎？為了貫徹捱得精神，阿潮除了決定不開冷氣不用電腦乾脆用毛筆寫潮文外，以後跟BB豬去通利琴行時，也故意不到有沙發及冷氣位置坐下，遲些阿潮打算練龜息大法減少呼吸，相信不但能省下氧氣，還能升仙成為聖人，一定不會被人屈呢！

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。