劇帝梁祖堯樂做「廚房佬」 細味廚房人生
發布時間： 2015/07/10 16:20
最後更新： 2015/07/10 16:28
▲ （相片來源：iMoney智富雜誌）
「劇帝」梁祖堯的舞台劇演員標誌，早已烙印觀眾腦海，近年兼營另一個他口中的「廚房佬」角色，至今共出版過5本食譜，本本好賣到加印再加印，又毫不吝嗇在社交網站、報章雜誌專欄上分享烹飪技巧，廚房佬形象非常入屋，滲透到不同階層家庭廚房中，亦因此令很多人認識原只在舞台上有名的梁祖堯，現在已反客為主，與飲食相關的工作佔他總工作量九成，收入多過做舞台劇。
由舞台劇演員到業餘廚師，阿祖坦言受外婆影響最深，事關他從小已入廚做外婆副手，一手好廚藝是由他的外婆廚房，傳承到今天的祖堯廚房。除了有個很會做菜的外婆，也有外公很會吃的基因，在訪問期間，邊吃著炸薯條，邊說及濃味食物的時候，阿祖講得最多是︰「諗起都想食！」
正修讀法國烹飪專業文憑的阿祖，6月出版的新食譜封面，戴上高高的廚師帽，卻不會扮高深，教煮高難度「拋鑊」賣技巧的菜式，而是一個又一個就地取材，連地獄廚神師奶也可烹調出的幸福料理，貫徹其「好玩、得意」，享受食物的開心時光作風。如這位劇帝級料理達人形容︰
無論舞台劇或者廚房，對我來說都係分享喜悅快樂的一個地方，舞台劇可以令觀眾的精神生活得到提升，而飲食可以滿足他們的肉體生活，我在社會的功能是滿足大家的精神及肉體，作為一個人可以做到呢件事，咁都幾開心！
與梁祖堯的訪問，是在他位於觀塘工廈的劇團排練室，這個地方有點特別，一邊是排練室，一邊卻是廚房，方便阿祖煮「大鑊飯」。阿祖的藝術形象太深入民心，站出來就是一個舞台劇演員的標誌，天生的演員材料，簡單如一條蕉、一個煎鑊、一隻耳杯道具，隨手拿起來也揮灑自如，擺出不同甫士配合表情拍攝。
憑人氣舞台劇《攣到爆》贏過香港舞台劇獎最佳男主角的阿祖，9年前的一個契機，他出版與外婆合著的《祖傳美味回憶》食譜，其後個人推出3本食譜，好賣到要加印再加印。阿祖又不吝嗇地在個人Facebook專頁，以文字或短片分享烹飪技巧，冧盡11萬粉絲大軍。今年再下一城，阿祖剛推出中英文對照的《祖堯廚房》食譜。
從外婆傳承一身好廚藝
一手好廚藝是由外婆廚房傳承到今天的祖堯廚房，他5歲、6歲開始「入廚」，見盡愛登士家人的麻煩，也從外婆身上學懂為家人下廚的幸福。
我屋企人好鬼煩，我阿姨唔食牛肉，我（小時候）只吃蛋同豆腐，我舅父及公公乜都食，我媽食魚，但唔食多骨的魚，我弟弟鍾意食蕃茄，我媽又唔食蕃茄，但婆婆可以遷就到每個人，大家都會食到每一道菜，我覺得婆婆超勁，但我覺得佢好辛苦，要煮8個人餸，所以日日都入去（廚房）幫手。
阿祖外婆另一門手藝是包糉和包雲吞，但外婆都能按「奄尖鬼」家人喜好不同材料比例包糉，以不同顏色繩子捆綁糉子識別。
如果可以食度身訂造的糉和雲吞，呢件事係好幸福！
入演藝那年阿祖20歲，外婆給他一個終極考驗，就是包辦一頓團年飯，外婆表明只當二廚幫手，阿祖最後也不負「婆」望，團年飯獲得一致好評，但他認為手藝始終未及外婆。
好似煲湯咁，料一樣咁多，她煲得好溶，自己要買多一倍材料先有咁嘅味道，但煲出來的湯勁少。問婆婆她會話︰『都係咁煮咋喎！』有啲嘢就係，個種功力就係個種功力。
他兒時的拿手菜，是跟弟弟合力製作班戟配金寶湯通心粉，這是每逢星期天趁家人未起床，邊看卡通片邊吃的自家製早餐。
同枱食飯培養演員默契
搬到這幢工廈排練室後，阿祖從外婆身上真傳的基本功可大派用場，半小時內煮起四餸一湯的「大鑊飯」。
我們不叫飯盒的，每次排練的Dinner Break都係我煮，導演會放早我半個鐘煮飯，我又會早半個鐘回來，切定洗定材料，煮十幾人飯。
填飽肚子，還培養演員彼此之間的默契。
觀眾好鍾意睇一樣嘢，就係我們之間的默契，默契係排唔到的，而係要在生活中去浸淫出來，係相處生活中得來，而食飯就係一個最好的相處，在那些時間不知不覺建立回來，好寶貴。
排練舞台劇以外，阿祖出食譜、又為報章寫飲食專欄、又做雜誌享飪節目主持，瓣數多多。
我哋行到上台，個角色緊要過自己本身，但電影電視唔係，自己緊要過個角色，佢哋會為自己形象而不做某些角色。我們（舞台劇）的Trainning不是這樣，所以（商戶）不會搵你。但作為一個廚房佬就不同，我係業餘，但又有要求、有啲技巧，鍾意同人分享，個形象幾Positive呀，係幾受客戶歡迎，所以Jobs係多啲。
阿祖說不出賺多了多少錢，但不諱言與食有關的工作佔總工作量九成，收入多過做舞台劇。
修讀法國廚藝學曉耐性
飲食已成一種Lifestyle，我那種係屬於好玩、得意、享受食物的開心時光，嚴浩（教的）是食咗有治療功效，淑儀姐去尋找得意食材……
阿祖喜歡與人分享的性格，就是他主持的Style，令節目充滿親和氣氛。
去年9月開始，阿祖自資在港修讀法國Escoffier烹飪藝術文憑課程。這個課程是訓練專業廚師，他形容每星期上兩天朝九晚六的課程，還勞累過排戲，試過累得在學校的後樓梯睡著覺，課程卻令他學懂耐性。
開始時成日被老師鬧，因煮法國菜要好慢，唔急得架，煎嘢要用中細火煎15分鐘先金黃色，不可用大火煎5分鐘，訓練我耐性方面真係幫到我好多。
紅蘿蔔要切粒切到好似機器切出來咁，每一粒都要一樣，又咪食落肚，點解要咁樣呢？後來才發覺，如果你唔切到佢粒粒都咁大，煮的時間就唔同，細粒30秒煮好，大粒要煮1分鐘，食落去會有些軟身、有些硬身，咪唔Professional囉！
法國Escoffier烹飪課程有別於法國藍帶課程，屬專業廚師級，修畢後可在法國叩門搵工，而阿祖最近更被派到文華酒店米之蓮星級Amber餐廳實習，經歷兩天寶貴經驗。
會否索性不做戲，跑去法國叩門當廚師？阿祖說要看機緣。
現在能分辨到是否有心機做的料理，食到心裏會有那種感恩、那種開心，別人為你煮，你食到開心的一餐，係一種知性交流。
愛逛街市吹水 買特價食材
梁祖堯對買菜有一套心得，他不會天天行街市，因家住元朗錦田的便利，會直接到農田買菜，既可買平菜，農夫也可以直接零售價賺多些，不用被蔬菜統營處壓價。但講到買肉，阿祖通常會買急凍。
我都好師奶嘅，如見急凍豬肋骨特價，梗係買多啲放雪櫃，依家雪櫃內有兩嚿牛面頰，係特價時訂番來；芝士可以Frozen，擺一年都冇所謂，呢度一包120元，超市細包已要60元，梗係買大包抵啲！
由急凍肉說到儲存雪櫃級數，阿祖不忘帶記者參觀他的雪櫃，如數家珍般展示特價戰利品。
餐廳用膳難嘗當地文化
但去到外地旅行，阿祖就一定會行街市，看看街市賣的種類和價錢與香港有何分別。
我去旅行好易識到新朋友，會在菜檔吹水，香港較冷漠，賣嘢就係賣嘢。試過有菜檔阿姐請我去佢屋企食飯，所以學到（當地正宗）家庭料理，而在餐廳吃只是充飢，我鍾意睇當地風土人情。
（節錄）
全文刊於《iMoney智富雜誌》第402期（收費閲讀）
iMoney智富雜誌facebook
撰文 : iMoney 智富雜誌
