一個為你甘去食麥記的人

City 10:34 2015/07/24

分享:

相片來源:網上圖片

阿潮近日成口生晒飛滋,連潮文都冇乜心機寫。點解?因為BB豬下旨,要我日日幫佢食麥當勞。

我知你諗咩,呢一刻你一定會話:

阿潮,你執到啦!搵到個肯陪你捱麥記嘅女友!

咪住先,你有冇搞清楚?依家係BB豬叫我食麥記,而佢依然日日大魚大肉。

何解?因為BB豬近排睇完套《迷你兵團》,不停話個班Minions「好打耳」,下旨要我幫佢換晒一套10款公仔之餘,仲要換埋3套Minions餐具套裝。

相片來源:Minions fb

你知唔知呢堆黃色人仔害得我幾慘?唔知?等我數俾你聽!

1. 男人老狗 vs 開心樂園餐

因為麥記每個星期五都會出新款的Minions公仔,所以每個星期五阿潮就要晨咁早仆去麥記買開心樂園餐,有時一個星期推出兩款公仔,仲要打孖嚟食兩個餐。

一入到麥記,你就明白咩叫顧家的好男人。人龍入面,10個男人有5個係幫女朋友換公仔,另外有4個係幫仔女換,仲有1個,阿潮估佢係真心愛Minions的毒男。

買個開心樂園餐啫,有幾顧家好男人呀?

問得呢個問題,足以證明你未買過開心樂園餐。首先,你要忍受麥當勞阿姐的「陰陰咀笑」,忘記世俗人笑你「低能」的目光,鼓起勇氣講句:「我要個開心樂園餐...」

然後,你要不厭其煩、再三提醒麥當勞阿姐「我要彈結他個隻,唔係另外果隻」,承受後面人龍眼睥睥、覺得你阻住買早餐的眼神。

最後,你要拎住個色彩繽紛、充滿Minions圖案的開心樂園餐紙盒。當你身穿一身西裝、皮鞋,左手拎公事包,右手...卻是一個開心樂園餐紙盒。

2. 被Minions 公仔搞到思覺失調

返到公司,坐附近的幾個港女同事原來都買咗Minions公仔。

惡夢開始!

港女同事不停噤手中的Minions公仔,之前幾款只係識扭來扭去,但港女同事今次換咗個識唱歌的Minions。

阿潮唔敢偷錄港女同事音,但在網上搵到條試玩Minions公仔的片:

當我同個客傾緊電話,隔離個港女同事每隔3分鐘就去噤一噤隻結他Minions,然後以一輪咀大叫:

好打耳呀好打耳呀好打耳呀好打耳呀好打耳呀...

經過一整日的折磨,阿潮耳邊就耐唔耐聽到微弱的「好打耳」聲音,擰轉頭又唔見有人講嘢,我懷疑自己開始有思覺失調。

3. 女朋友日日Bello前Bello後

BB豬自從睇完《迷你兵團》套戲,阿潮就發現同佢出現溝通問題。就好似今朝佢打電話俾我,一拎起電話我真係想CUT線:

BELLO!BELLO!

原來佢學緊Minions講「你好」,如果唔係有來電顯示,我真係以為BB豬俾外星人綁架。

之後晏晝BB豬又打嚟約我食飯,問佢食咩,佢係咁答:

Banana!Banana!Banana!

希望今晚BB豬上我屋企食飯唔好再扮Minions,否則潮媽誤會佢鬼上身,用紅筷子夾佢中指就唔係幾好啦...

相片來源:網上圖片

其實麥記每次推出依啲大熱卡通人物公仔,一班爸爸、男朋友、老公都只可以自求多福。

仲好記得當年初中為咗氹坐隔離位班花,阿潮曾經換過Snoopy同Hello Kitty。換Snoopy可算是最慘痛經歷,全套28隻,日日新款,即係日日都要食老麥。當年阿潮眼見唔少人只要玩具唔要包,整個老麥餐放入垃圾桶,好少少就請公公婆婆食。

相片來源:本報資料室

玩具剛剛推出時,大家因為「人有我有」心態就一窩蜂衝去買,但熱潮過後,玩具往往就住進床下底、梳化底或者堆田區。當你看到玩具封塵,不敢會問一句「日日食老麥為咩?」

阿潮希望兵軍熱潮快d成為過去式,各位兄弟,頂住呀!

撰文:潮人

我叫阿潮,係一個人,來自潮洲。低調啲可以叫阿潮,俾面就叫聲潮人,鍾意寫潮文,香港發生咩事我都寫,潮文乜乜乜。

撰文 : 潮人