「蝦米鴨舌」原來唔食得！

阿潮表妹早兩天放暑假，係潮州落咗嚟香港shopping，仲帶咗好多蝦米、鹹魚乾、臘鴨等鄉下特產嚟屋企探我哋，潮媽煮咗餐「九大簋」招呼佢。

飯後我拎起部電話同BB豬WhatsApp時，正在吃水果的表妹突然同我講：

表哥，等陣得閒可唔可以幫我裝鴨舌呀？我想裝蝦米、搜狗個D啊！

我以為表妹叫我裝好佢帶過來的蝦米，臘鴨等鄉下特產，就隨口答佢：

你想裝蝦米？好呀！我等陣叫阿媽攞個吉樽出嚟裝！

點知表妹聽完後哈哈大笑：

咩呀？我想你幫我部新iPhone裝蝦米音樂個啲鴨舌，唔係用個樽裝食個啲蝦米呀！

蝦米音樂？經表妹解釋，一頭霧水嘅阿潮終於明白，蝦米音樂係內地好熱門嘅音樂聽歌應用程式，「鴨舌」就係Apps的諧音。

阿潮後來幫表妹裝「鴨舌」嘅時候，發現原來內地人常用的Apps與香港人有大不同，今次又學到嘢喇。

既然寫開潮文，阿潮索性上網揾埋台灣人常用的Apps，來個中港台Apps大比較：

1. 瀏覽器

內地人通常會安裝「搜狗」瀏覽器，香港人及台灣人則熱衷於用「Google Chrome」。

阿潮今年初返潮州拜年時，試過用Chrome搜尋失敗，後來才得悉Google退出中國市場，懷疑Chrome因此無法運作。

2. 即時通訊軟件

內地人的智能手機基本上都會安裝騰訊推出的「微信」，香港人則較多人會選擇「WhatsApp」，台灣人則會偏向使用「LINE」。

阿潮就覺得，微信、WhatsApp、LINE的功能大同小異，但微信就多一個朋友圈功能，用戶可以隨時上傳自拍照或更新近況比朋友讚Like 。

3. 音樂播放器

正如阿潮的表妹，阿里巴巴集團旗下子公司推出的「蝦米音樂」，受到內地年輕一族熱捧。阿潮聽表妹講，內地還有個名為「雲音樂」鴨舌，都比較多人使用。

至於香港及台灣，則較多使用源自台灣的「KKbox」。

4. 社交網站

因Facebook、instagram等Apps在內地被禁，內地網民活躍於「新浪微博」更新自己的狀況，及關注明星名人的動向。

阿潮早年都有玩過新浪微博，後來因忘記密碼就沒有繼續使用，所以我知道很多香港的明星都有微博帳戶，增加係內地人氣。

毋容置疑，香港及台灣的facebook用戶居多，instagram也是另一個較為熱門的社交網站。

5. 新聞網站

阿潮自從使用智能電話後，印象中好似再沒有買過報紙，甚至連免費派發的報紙都懶得伸手去接，原因好簡單，下載個新聞網站的apps，手指動一動，就知天下事。

阿潮表妹話，內地年輕人都用手機瀏覽新聞居多，她們較喜歡下載叫「今日頭條」App。阿潮上網查過，「今日頭條」用戶可以根據自己的興趣接收相關新聞，活躍用戶已經超過2500萬。

香港及台灣傳媒Apps比較百花齊放，隨讀者的興趣自行下載。香港有蘋果動新聞及Yahoo新聞等，台灣則有主打年輕人的「knowing新聞」。

阿潮就諗，要知道對方是香港人、台灣人或內地人，睇下佢嘅手機頁面，就可以一秒鐘分得出啦！

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。