孫立民:職場人在野 卸膊射波實用求生手冊

職場 10:48 2015/08/03

分享:

(相片來源:W Theatre 官方facebook 專頁)

經常被老闆「詐型」,工作又多「甩漏」?作為上班族應學學職場求生術。盈力僱員服務顧問首席顧問孫立民形容職場求生猶如荒野求生,總要學一、兩招「卸膊射波實用招數」。

不過,究竟為何上班族要「卸膊射波」?孫立民又有其看法:

工作間「卸膊射波唔認錯,fax影印唔識喎」,仍基本「人在野」Man vs Wild求生技能,第一季先推出「卸膊射波實用手冊」。

情境一:

老闆想你設計一張Excel表,點算存倉貨品

射波應用範例:

「我唔識做呢種表囉 (話唔識Excel有點浮誇,因你見工時肯定講過Office 2013同Windows 10都非常熟練) 」

「我未做過喎,記得應該好似係Carol做過。」

點樣交戲:

要一臉天真,「囉」同「喎」字可略為提高少許聲調,加強單純無知的感覺。

實情是:

你運用了二十項財務公式把過去十年賽馬成績製作了數個具追蹤參照功能的報表。

情境二:

另一個team突然接到緊急project,想請你個team幫忙

射波應用範例:

「呢單嘢我地畢竟經驗少,驚拖慢進度就大件事,Peter果組有經驗又快手,不如我幫你攞俾佢地。」

「咁,我真係好想幫手囉,但手頭上有好多十萬火急嘢趕緊,兩個星期度就clear晒,到時一定第一時間take up,你放心。」

點樣交戲:

堅定中流露五百克委屈,令對方相信俾嘢你做係佢唔啱,乃不體恤同事之行為。

實情是:

你有好多WhatsApp趕緊要覆。

情境三:

顧客發爛渣投訴遲交貨,老闆問責要交人頭

射波應用範例:

「呢單嘢我地sales team已經盡晒力,大家一場同事邊個出事我地真係唔方便講。」

「我地已經提過IT Dept,呢個客唔拖得,唉,你知佢地...(下刪五百字) 」

點樣交戲:

攤開雙手,表示沒有事情要隱瞞,附誠懇眼神,見老闆前對鏡練習數次講大話唔好眨眼,呢樣嘢你唔洗扮謙。

實情是:

張order 你忘記俾account office,IT部當然半點也不關事。

情境四:

你過了deadline還未交出report,老闆call你追殺

射波應用範例:

「依,你收唔到咩?我明明前日send咗俾你,等我即刻check check 先」。跟著第一時間收線,無毒不丈夫,索性掛起電話再關掉手機。

「其實個report我前日已經做好,不過有組統計數字IT部交過來時我覺得好有問題囉,於是叫佢地盡快clarify,點知到家陣都冇答覆。唉,呢次唔係第一次….. 」

點樣交戲:

範例a) 要流露驚訝聲調,可加「有咁嘅事」、「上次都係咁」或「唔到你唔信」等片語加強效果

範例b) 則要帶一點甚至多點氣憤,要自己也深信IT部全都是人渣,提起真係有點興咁!

實情是:

你現正專心埋首趕緊report,不過是上個月已經過了deadline的那份。IT部?可能連老闆都不為意公司根本沒有這個部門,只不過經常聽同事提及而已。

正貨的實用求生手冊

有時,一個人於工作間,有如處身好wild的荒野一樣,當你缺水缺糧缺wifi要掙扎求存時,你會食蚯蚓喝尿殺可愛馴良的斑鹿,為了求生,一切都好像變得十分合理。

不過,有沒有想過是誰首不先弄到缺水缺糧?有沒有想過只要上少一點fb、午飯才在whatsapp群組搭訕、有勇氣嘗試未做過的項目、不計較上司間中的額外工作。你會受尊重一點、你會受嘗識一點、你間屋會大一點、你部車可能歐洲一點。

更重要的是,你不用花心思時間去閱讀這篇「卸膊射波實用手冊」!

各位若遇到職場管理、辦公室政治、人際衝突、或前途抉擇等難題,歡迎留言提出。筆者會詳盡分析和解答,亦可瀏覽盈力僱員服務顧問網頁

撰文 : 孫立民 盈力僱員服務顧問首席顧問