鄭丹瑞：首副與首富？

「而家啲名真係改得千奇百怪。」好事之徒說：

第一次聽首副呢個 term，我還以為有大學尋找全世界最有錢嘅富豪捐錢，結果原來係搵首席副校長！


首副其實係首席副校長嘅簡稱。恕我多口，我覺得呢個稱呼完全不合邏輯、不合文法，既然係副，又何解係首？副即係阿二，首即係阿一；


而家堂堂一間大學要出去搵一個叫阿一阿二嘅人，你話 make 唔 make sense？你到底叫佢返嚟做阿一？定係做阿二？

吹水會上，一眾損友對是否有人插水？是否文化大革命？紅衞兵？已經講得意興闌珊，開始轉移話題到「尋找首副」上。

「咁又唔關大學事嘅，係大家貪方便改到咁樣啫。」損友甲企圖為大學辯護。

「難道等埋發叔教訓仲未夠深刻？而家又玩等埋首副？！」好事之徒意猶未盡：

我真係好想睇吓邊一位咁勇敢、咁有大智慧，夠膽接受香港大學首席副校長呢個職位？因為佢上任嘅第一項工作，並唔係諗吓如何搞好香港大學校務工作；而係要由佢去決定請唔請嗰位充滿爭議性嘅副校長；


佢嘅命運同下場，唔使楊師傅、蘇師傅合指推算，都已經預示得好清楚，請佢又死、唔請佢又死！

校委會委員們都是香港最高學府培育出來的精英領袖，他們對「等埋首副」的決定，當然有十分合理的原因，礙於保密制度，「不可告人」而已。

原文刊於《經濟日報》收費閱讀