點解梁特首可以成日放假？

又到暑假，嫻姐都想放年假陪皇帝仔。正當今日向老細遞假紙申請的時候，點知阿頭已經搶先一步，然後拋下一句: 「我唔係公司既時候，你幫手睇住大局！」

真係激死人！我阿頭每一次都是放假大過天，每逢過時過節，或者當公司有大Project時，阿頭例牌一句:「我屋企有d事」，但其實就同老婆仔女去北海道疏乎，留低個爛攤子俾我同一班手足。

嫻姐做得打工仔，都一早接受這個現實，皆因下屬幫上司執手尾係人工包埋。不過嫻姐無諗過這個道理連官場都適用。

點解嫻姐會咁講？因為前幾日睇報紙，見到特首梁振英又休假，係好奇心驅使下，於是到特首辦網站翻查梁振英自上任以來放了幾多日假。

由2012年至今，梁振英已經放假約94日！均真啲，扣除星期六、日例假，放了66日假。

睇到這個數目，身為一個普通打工仔的嫻姐真係忍唔住問一句：

究竟特首有幾多日假放架？

原來行政長官每年有22個工作天的年假，每年累積年假最多22天，離任時剩餘年假就會自動取消。

嫻姐照「賬面數」計算，梁振英由2012年上任至今，以每年有22日年假計算，上任3年應該總共有66日，簡單看來，梁振英的年假真係「算到盡」！

不過放假係人之常情，有假唔放你先唔係正常人，放假最高境界就係「放啱時候」。

嫻姐睇返過去新聞，發現唔止一次香港出現大事件時，梁特首就走去放假。

就好似屋邨鉛水風波仍然未解決，梁特首就輕輕鬆鬆去放假。

點解可以輕輕鬆鬆放假？各位打工仔學嘢喇！首先，當然你要有年假。第二，就係有一個「好打得」的下屬助手。

每次梁特首「輕輕的我走了」，政務司司長林鄭月娥就要「輕輕的來」。放假的人不單止可以避過應付難搞的Project，就算放完假，都可以輕輕講一句「唔係我跟開喎！」就可以大條道理唔幫手。

不過我係師奶仔，估計特首一定心繫香港，在遙遠的外國都會遙距指揮香港運作！

嫻姐睇見林鄭都覺得佢辛苦，每次政府有難題總是由佢做先頭步隊出來拆局。嫻姐再睇政府公佈，原來林鄭由2012年至今只是放了大約42日假，再扣除星期六、日，實際只放了27日年假，真陰公！

最後你可能會問，一個普通打工仔有幾多日年假？根據《勞工法例》，僱員受僱滿12個月便可享有有薪年假，由一年7天有薪年假「起標」，隨後按年資再增加年假日數，9年年資的僱員則至少有14天有薪年假。

作為一個普通打工仔，大家都係唔羨慕得咁多，聽日準時起身返工！

都市嫻情

嫻姐，80後職場師奶，兼職返工，正職做「阿四」，陪皇帝仔吃喝玩樂，最叻計婆仔數，平日嗜好就是捐窿捐罅搵著數，有着數記得預埋我！