張晨：我係做IT…不過我唔識整電腦

呢個世界有種關係，你哋貌似好close，但實在又好遠。
佢有時想你「幫下手」，你拒絕又唔係，應承又唔係。

唔應承並非你份人涼薄，只係佢經常性誤會你嘅「工作範疇」，所以開出嚟嘅要求你真係未必識做。
 

呢種關係就係「親戚」….

每次畀親戚知你做咩工作都係一場悲劇。
因為你永遠講得唔詳細，佢亦知得太表面。然後添加幾分誤會、再混和些微幻想，就出現以下呢句：
 

明仔呀，你做it㗎嘛！四嬸部電腦壞咗呀，你幫我整整佢呀！

究竟有邊條法例講明，做it就識整電腦？

It的確可以係維修部，但都有寫網頁、程式、甚至係設計產品。最大鑊係四嬸連自己部電腦壞咩都唔知。大約佢認為做it嘅人係可以同電腦溝通到！

如果明仔可以同電腦談心，佢一早同自己部macbook結婚啦！使每日都「左右手」？

另一個朋友，阿健。佢就做designer。哈！佢仲大鑊，明明係平面設計師。但啲姨媽姑姐就逢係「設計」都搵佢。

包括
室內設計：

健呀，我間屋裝修，幫我望下呀！

插畫設計：

健呀，我想畫啲人像畫，你designer實識！幫下手

時裝設計：

健呀，你表妹下個月謝師宴，你幫佢度身設計條裙呀！

勁過勞工處啲求職要求，你話死未！

另外仲有個朋友阿偉，佢就經典啦，就職某大型電訊公司，咁你知啦，大公司職位多，部門更多，佢職位負責嘅嘢就唔太關電訊事。

不過親戚知道佢係呢間公司之後，無論轉plan、買新機、整電話等等…全部關佢事，最後連「投訴無人聽」、「網速太慢」、「想轉個靚number」等等，都係關佢事！

▲ 相片來源：Pixabay

佢崩潰。因為佢真係幫唔到，次次同親戚解釋一輪，啲親戚都覺得佢係唔想幫而唔係幫唔到，無人信佢。成為非洲黑夜嘅一頭烏鴉，埋葬於黑暗之中。

又講返做it𠴱位明仔，最後佢推無可推下都係去咗幫四嬸整電腦。
但係我必須要講，明仔真係做it。
不過，係I.T. 
無錯，賣衫嗰間I.T.

所以，佢的確係完全唔識整電腦嘅。
各位親戚，有時諗多一步，高抬貴手，畀條生路行下！

原文刊於張晨（鳥不起）facebook，獲作者授權轉載。標題經TOPick 修改，原題為〈我係做IT…不過我並唔識整電腦嘅〉