胡楓 曾江 Joe Junior 玩轉老朋友
發布時間： 2015/08/19 10:43
▲ 相片來源：4個小生去旅行fb
可能見識過「戰鬥民族」，人也變得火氣十足，難怪四哥在《4 個小生去旅行》記招突然「阿燥」上身，鬧出爆粗又動粗風波，疑幻似真。節目監製指整個真人騷行程中，他們雖如大細路般互窒，卻完全看不到有任何心結的先兆；專訪中，胡楓、曾江、Joe Junior 亦頗見默契。
4 位老朋友同遊俄羅斯雙城，一邊聚舊一邊歎世界，觀眾不妨落足眼力看他們如何真情流露。
8月10日黃昏，3 位小生做完專訪要錄音，需要先醫肚，所以訪問在餐廳進行。結果，作為電視城稀客，80 歲的曾江（Ken 哥）甫出現，即遇上張國強請他坐下飲咖啡，未幾，曾跟他合作拍戲的林家棟、錢嘉樂都先後走過來向他問好。Ken 哥心情靚靚，3 人中以他最滔滔不絕，有話直說，霸氣之餘，也有搞笑一面。
至於向來可親的胡楓（修哥）就邊吃三文治邊細心聽着各人談話，不時補充，甚或跟 Ken 哥互窒，已 83 歲的他比記者前年訪問他時更精靈。而 Joe Junior 就最「順得人」，被 Ken 哥窒完也總是笑笑口。16 天俄羅斯莫斯科及聖彼得堡之旅，由景點說起，談歷史講飲食文化，再跳到粵語片時代的片場回憶，老朋友的確話題多多。
食在俄羅斯
問小生們俄羅斯之旅感覺如何，Ken 哥率先大聲回應：
好玩！俄羅斯好多地方如紅場，在明信片見過，未親身去過，感覺好熟悉又陌生。我最鍾意聖彼得堡一個廣場，紀念二戰時期列寧格勒（即聖彼得堡）人民，曾被納粹德軍圍攻了 3 年仍死守，單是餓死人數已非常多，我和阿修去都有很大感覺。
還以為在美國大學修讀建築系的 Ken 哥，對欣賞建築物最有興趣，事實卻不然。
老大哥的建築得個大字，較特別的就是『檸檬頭』（克里姆林宮圍牆外的聖巴素大教堂）囉。
心水清的修哥即時插嘴（指着熱檸水）：
這些就是檸檬頭，你講的係『洋葱頭』啊。
其實 Ken 哥最關心飲食。
莫斯科我向來不會好恨去，因為她窮，食物唔會太好味，都不似我在意大利 Palermo 小村，試到一個老太太煮的 pasta 咁好食。
Joe 哥此時不忘賣口乖：
我就覺得在俄羅斯食過和飲過的，全部都不及 Ken 哥和四哥入廚煲的雜菜羅宋湯和肉醬意粉咁正。
四哥曾江下廚話當年
原來，節目監製今次安排他們一行人到莫斯科一個家庭探訪兼下廚，讓飲食講究的 Ken 哥一展廚藝。
那地方我們不熟，又冇咩時間，所以買的都是比較 simple 的材料，如番茄薯仔椰菜紅蘿蔔，再加少少肉咁。我好鍾意煮飯，在香港便多數去九龍城街市。
Joe 哥自言負責洗碗，Ken 哥就說當天的得力助手其實是四哥，幫他切菜批皮等。Ken 哥笑說：
佢（修哥）呢世都未入過廚房。
風趣的修哥即反駁：
入過，未煮過嘢啫。
四哥和 Ken 哥有沒有邊煮菜邊話當年？
我們這些年紀，朝早做過的事不會記得，但廿年前的事卻仍然記住，我們永遠都話當年㗎。以前不是常約出來玩，但拍戲不是在華達片場就是堅城片場，接到通告就會又見到個傻佬（老四），經常都見面。
Ken 哥和四哥當天的廚房對話滿載溫馨，抑或火藥味重？令人很好奇哩。
四哥出名貪靚，衣着配搭講究，修哥就形容他好似移民般，帶了幾大喼靚衫出 trip。Joe 哥則說四哥不會因為每天花時間襯衫而要大夥兒等他：
他仲早過我們起身，一早到酒店 coffee shop 歎早餐。
修哥就自爆四人行中最遲起身，Ken 哥最早（凌晨 4、5 點）起床，各人生活習慣大不同。
口沒遮攔最開心
今次拍攝時間是晨早 9 點多出發，晚上 8 點收工，修哥形容是「豪華舒服團」，然後話題旋即轉到 Ken 哥在行程中病倒一事，他高聲回應：
因為玩越野車太興奮，這玩意我年輕時成日玩，但好耐無玩，今次就玩到忘我。我向來容易流鼻血，但今次流了 4 個鐘，最後搵了一個巫婆醫生（莫斯科四季酒店駐診醫生），她幫我打了一支針，15 分鐘後就止血。
修哥說當日其餘 3 人出外拍攝，返回酒店後才知道此事，所以也沒有擔心。Ken 哥直言向來有痛風故行得慢，加上病倒，之後便要求坐輪椅。
他們輪流推我，不知幾舒服！
外界都關心未到 7 字頭的 Joe 哥會否如上回般被大哥們欺負？「冇，真係冇。」Joe 哥搖頭，卻又被 Ken 哥窒：
4 個之中，他年紀最輕，有粗重嘢，他好應該應徵來做呀，咁先係坐同一條船嘛。
Ken 哥年前也曾參演上海東方衛視的《花樣爺爺》真人騷，夥同台灣的秦漢、內地的雷恪生等 4 位老戲骨去了瑞士及法國。兩次大旅行相比，哪個更好玩？
（內地電視台）他們對外就說有 budget 做（食住豪華），其實不是，而且我同其他人又不熟；今次好玩在於我們幾個玩泥沙大，可以口沒遮攔，冇嘢唔講得，而且我們之前又未試過一齊旅行。但我食唔到道地的俄羅斯嘢好唔開心，因為我對生活質素有要求。
Ken 哥強調，俄羅斯之旅最好就是沒有太多刻意安排和要求：
去參加軍事訓練，唔叫我都會做啦；太空人訓練，我話自己唔玩得嘞，最後只得四哥經身體檢查後合格可做到。我覺得老四今次的參與很積極和有熱誠，他這個年紀（79 歲）都玩到刺激嘢，我係好佩服佢。
監製回應 記招鬧劇
對於上周三的記招鬧劇，兩輯《小生去旅行》的監製蘇敏儀（Irene）坦言就是主持們展現真性情的最好證明，不擔心會影響節目。
這真人騷本身已夠吸引，毋須咁樣做宣傳。節目的初衷是一班老人家很難得地和老友去旅行，盡情玩盡情享受，而他們都是大細路，返老還童般地很直接率性流露真我，鏡頭前後都毫無顧忌地互窒，仲要係窒得『好應』，而大家都唔會有 hard feelings，過後又再攬頭攬頸，所以我們都已習以為常。
Irene 指今次因為多了曾江參與，所以也加多一位幕後工作人員到當地照應。
其實他們都好精靈，不用我們怎樣額外照顧。至於會否再有第 3 輯？真的要看他們體力能否應付了。
原文刊於《經濟日報》（收費閱讀）
