鄧藹霖：領導無方

午飯時間，幾個中層行政人員互相大吐苦水。

那朝早，我只不過是遲咗五分鐘啫，佢就黑晒面惡聲惡氣咁提醒我啦！喂，大家都一把年紀啦，咪當我係小學生咁管啦，佢以為自己係校長咩！

唓！別人稍為遲到，佢就小事化大，佢自己何嘗不是時常遲到？哼！不過佢有選擇性嘅，同我哋班細嘅開會，咪遲囉！你哋有無留意，逢係老闆嚟開嘅會，佢例必晨咁早就坐正正喺度，仲笑口盈盈添，抵得佢呀！

佢向來就有兩張臉㗎啦，對住老闆就油嘴滑舌，唔係又點會不停升級？老闆又怎會有機會目睹佢副惡人相？

佢升咁多級有乜用？佢咪係做番低層次嘅工作？佢連一張例行通告都要管、廁紙用幾多格又要管，虧佢係高級行政人員，好心管啲高層次嘅工作，咪雞皮蒜毛都管一餐啦！

哼！美其名係事事親力親為，其實係自信心嚴重不足，怕地位不保，是甚麼也不願下放的庸材！

也許是一語中的吧，眾人齊聲歡呼鼓掌。

兩小時後，剛才議論紛紛的幾位中層行政人員與他們狠批的高級行政人員一同開會。

怎樣？誰有意見？

眾人輕輕垂頭或撇開視綫，會議室鴉雀無聲。暴君領導之下，即使是賢能之士也不敢妄自發言，最終都變為一眾「廢柴」，哀哉！

全文刊登於《經濟日報》(收費閱讀)。