鄭丹瑞：另類會議

損友聚會，好事之徒少有地做旁觀者，不似平日搶着發言。我見他躲在一角，神色凝重地不停用手機發短訊，又留口訊，八卦地問他：「公司有緊要事咩？」好事之徒在狂發短訊與口訊之間，匆匆解釋：

同一時間開緊三個會！你哋吹住水先。

我們這班損友曾經立下誓言：吹水聚會只談風月，不准談公事，否則大刑侍候！如今好事之徒不僅犯下天條，而且一次過重複犯三條罪，眾損友紛紛議論，該如何處置他？但大家又好奇，好事之徒是如何同一時間開三個會呢？

拜科技發達所賜，手機有短訊群組，我將公司一班專門負責市場推廣嘅同事組成一個群組；

 

另一個群組係財務部嘅同事，第三個群組係營銷部門嘅同事，一單生意，我可以同時跟三個部門開會，又唔使親自主持，我想要睇任何資料，啲同事十秒鐘內就可以喺網上搵到，我第十一秒就收到，最正係需要腦震盪嘅會議，大家唔使困喺會議室，你眼望我眼，乜都度唔到。

 

我試過放大假，同老婆去布吉做 spa，做做吓，忽然想到條絕世好蹺，即刻發短訊俾香港同事，北京分部嘅同事立即加入意見，大家喺個群組入面你一言、我一語，我未做完個spa，老闆已經收貨！

 

佢仲喺群組講笑話：以後可以唔使租寫字樓，有移動電話就開得工啦！

好事之徒鼓勵一眾損友，嘗試這種另類會議，我，心郁郁。

原文刊於《經濟日報》。（收費閱讀）