4個填表抽白居二的貼士

新一期白居二（白表免補地價買二手居屋）接受申請，噚日WhatsApp被各類白居二疑問洗版，Denise亦暫且擱下村屋呢個議題，搞掂張白居二申請表先！

去年底Denise曾深入鑽研白居二嘅遊戲規則，變成半個小專家，可惜輸少少運氣無被抽中，今次惟有再接再厲！查實參與呢類規矩多多嘅「遊戲」，首要法則就係唔好犯低級錯誤，其次亦要有些少策略，Denise總結咗幾招上年嘅經驗同大家分享：

1. 獨生子女可夾親友組隊

由於2,500名額中，只有250個配額撥畀單身人士，為增加中籤機會，好多人會與兄弟姊妹組成「家庭」名單申請。獨生子女點算？係咪只能用單身名義申請？No！睇清楚房署嘅申請須知，家庭嘅定義除了父母子女、祖父母，仲有一欄叫其他親屬。之前Denise問過房署，對方話堂兄弟、表姊妹、姑姐同個姪都算家庭，只要提供到親屬關係證明就得。

2. 成員要夠18歲

如果你搭細佬妹申請，記得留意佢喺截止申請日（即9月8日）滿18歲未，事關唔夠秤，一定要寫埋阿爸阿媽個名入申請表。

3. 夫婦不能分開申請

媽媽可否撇甩爸爸，同囡囡兩個人以家庭名義申請？No！除非父母離婚，否則夫婦一定要同時出現在同一名單上。

4. 唔好用錯筆

填表要用黑或藍色原子筆，英文要用大楷寫。記住唔好用塗改液！寫錯刪咗佢，喺旁邊寫番啱、簽個名就得。

Denise祝大家好運！

全文刊於《晴報》