10條最怕老細問的廢問題

人在江湖，生不如死。根據「薯仔大聯盟」的非正式官方統計，10個打工仔有11個都會怕咗老細，例如怕佢鬧、怕佢捽、怕佢嬲豬及黑面等等。

而小弟就最怕老細問呢問路，尤其是廢問一啲迫你廢答的問題……

問題 1：乜乜乜搞掂未？

口講：得得得！就快搞掂，轉頭Send畀你。
心諗：手得兩隻，未搞掂係咪你幫我做丫？

問題 2：點呀？忙緊咩呀？

口講：跟緊幾個Project，晏少少仲要出去見客，仲有個會要開添…
心諗：你煩少幾句咪無咁忙囉…

問題 3：入嚟房傾兩句

口講：好呀，即刻嚟！
心諗：真係兩句至好…

問題 4：今日收工有無野做？

口講：無呀！有咩事？
心諗：點會無野做呀？問嚟都「多舊魚」。

問題 5：咦？你唔舒服呀？

口講：（咳咳）係呀，醫生話我有少少感冒。
心諗：見我戴住個口罩都仲要問，你眼殘定腦殘呀？

問題 6：呢排點解咁早走？

口講：最近報咗個Part-time課程，逢星期二、四都要上堂。 
心諗：OT到7點都仲話早，畀埋條命你好無？

問題 7：你係度做咗幾耐？咁簡單嘅野都仲要問？

口講：（數數手指）Um…都有1年喇！
心諗：係度簡直度日如年，計埋都有萬幾日喇 T^T

問題 8：呢單野諗住點拆掂佢？

口講：當務之急，我覺得要盡快通知批客，跟住…（下刪1萬字）
心諗：我諗到就坐左你個位啦~

問題 9：你知唔知自己衰咩？

口講：今次係我事前無同個客解釋清楚，以為…
心諗：乜我有野衰咩？咪衰在跟著你囉！

問題 10：你覺得我點呀？

口講：Er…老細你對啲同事都幾好丫。
心諗：就係對我唔算好囉！

全文刊於 CTgoodjobs

更多職場、筍工行情，即上CTgoodjobs