我們都是這樣被「嚇」大的

嫻姐最近幾天晚晚要OT，昨夜返到屋企已經好攰，攤係張沙發諗住休息的時候，皇帝仔突然係房間走過出，煞有介事的跟我說：

媽咪！講個秘密你知吖！

難得皇帝仔這麼有興緻的和嫻姐傾計，無論幾攰都要聽聽皇帝仔有甚麼秘密要講。

誰不知皇帝仔竟然說：

隔離位嘅明仔今天好唔開心，佢媽媽同佢講，原來明仔係垃圾筒執返嚟！

我聽到後就知道明仔嘅媽媽講大話嚇他，自己不禁大笑，反問皇帝仔：

咁你相信嗎？

皇帝仔一臉天真，皺着眉頭回答：

信呀！佢媽咪都幾好人呀！見佢係垃圾筒無人要就執佢返嚟！

嫻姐見皇帝仔信「城市傳聞」信到十足，都不禁想起童年的時候，阿媽講過幾多個大話欺騙我這位無知小孩！

我無直接講個真相畀皇帝仔聽，只告訴他，媽媽細個的時候都曾經被公公婆婆欺騙過：

1. 如果你唔聽話，警察叔叔就會來拉你！

相信好多人細個每逢發脾氣、扭計，阿爸阿媽無可奈何的時候，都會念出呢句「緊箍咒」，威嚇子女3秒內乖乖聽話。

想當年，仲係幼稚園學生嘅嫻姐，放學見到警察巡邏，內心都會有種莫名的恐懼，真係好驚警察叔叔會拉我返差館，然後見唔到爸爸媽媽！

直至讀小學，才知道警察叔叔只會捉壞人，我這麼可愛的小女孩，警察叔叔又怎會捨得拉我呢！

不過，嫻姐近年對警察的印象完全改觀，係嫻姐心中，部分警察等如「無牌爛仔」，只識對付手無寸鐵嘅市民。

2. 吞西瓜核會頭頂長西瓜

 「大西瓜多好呀，個個都想食，大家分切開它，味道頂呱呱……」這首兒歌，陪伴了嫻姐走過童年、皇帝仔亦有聽過。

當時懵懵懂懂的我，聽到「吞西瓜核，頭頂會長西瓜」的歌詞，半信半疑，於是走去問媽媽是不是真的。

嫻媽為了整蠱我，居然說「是」！

記得有次不小心吞下西瓜核，擔心頭頂真的會長出西瓜被同學取笑，傻到躲在被窩中哭泣，每天醒來就摸摸頭上是否有瓜苗長出，過了很多天後見到沒有動靜，我才知道是假的………

皇帝仔是「超級無敵西瓜刨」，但嫻姐每次在超級市場買到的都是無核西瓜，況且現在的小朋友超級醒目，哪有如此容易被整蠱。

3. 食剩飯，將來嫁個豆皮佬！

細細個吃飯，嫻媽總會不厭其煩地同嫻姐講：「唔好食剩飯啊，如果唔係，大個咗會嫁個豆皮佬！」當時入世未深的我，對於豆皮佬是什麼毫無概念，經過不斷想像之後就幻想為男版巫婆。

格林童話中的巫婆，肯肯定是萬千少女的公敵吧，嫻姐肯定唔想白馬王子變青蛙，加上在嫻媽日嘮夜叨的輪番攻勢下，嫻姐由細細個開始，每次吃飯都很努力吃光碗裡的所有飯！

雖然長大後知道這句話毫無科學根據，但我依然吃得「一粒不漏」，惜飲惜食是美德，只不過嫻姐不會再用這個謊話去教育皇帝仔。

利申：嫻姐個老公雖然沒有劉華咁靚仔，但絕對青靚白淨，連痘痘印都無！

4. 你在石頭爆出來！

每個小朋友都對自己從那裡來充滿好奇心，但礙於上一輩對性教育比較含羞，以前每次問嫻媽：「媽媽，我係邊度出嚟？」她總會答我：

你係石頭爆出嚟囉！

想當年電視台播《西遊記》，劇中美猴王從石頭爆出來，嫻姐真的有那麽一刻相信過，更曾很傻很天真地問過嫻媽

媽媽，係咪每粒石頭都有個BB架！

上了小學後，嫻姐都有聽過同學仔的不同版本，有的稱從垃圾桶拾回來的，也有的稱從孤兒院收養回來的……

5. 你再唔訓丫烏婆會來捉你！

嫻姐現在每天最大的心願，就是可以睡多半小時，但細細個最討厭就是「搵周公」，每晚都與媽媽戰鬥到最後一刻。

每當我不肯訓覺時，媽媽總會拿丫烏婆出來嚇我，然後我就會九秒九跑上床「扮訓着」，等媽媽回房後再偷偷扭開檯燈繼續玩！到了現在，丫烏婆不曾出現，而我，亦不知道丫烏婆是誰。

雖然，我們都是被阿媽嚇大，但現今科技發達，同返小朋友講以上的「大話」，他們都未必相信。再者，教小朋友還是用身教方式好過嚇他們吧！

都市嫻情

嫻姐，80後職場師奶，兼職返工，正職做「阿四」，陪皇帝仔吃喝玩樂，最叻計婆仔數，平日嗜好就是捐窿捐罅搵著數，有着數記得預埋我！