拆解女仔10句反話

同身邊的女仔 / 女朋友相處，每日都好似猜謎。

女仔會抱怨男仔經常講大話；男仔又經常投訴女仔「口不對心佢最勁」。在這個藍剔都要「芒」住的世代，女孩子唔會再問「呀媽同我跌落海救邊個？」此等問題。反之，由以下10句最常見的反話取代︰

1. 「我好似肥咗…」

正解︰「話我知我都係咁瘦！」

這句一出，即陷入兩難︰講事實，即死；唔講，情況就會變本加厲。

「唔緊要啦，你都係咁得意咁瘦呀！」等hea應大概可在短期內安撫情緒，但唔想得把口，建議最好付諸行動，陪佢做運動，成件事即刻羅曼蒂克。

2.「無事呀。」

正解︰「我好有事，你快啲Follow up唔該。」

當發現對方講呢句時木無表情，就好明顯出事。有可能係唔想你擔心，但更大機會想你關心。

首先你可試探性問「發生咩事？」，之後再補一句「真係無事？」，記住，真相並不重要，重點是讓她知道，有人願意分擔就夠了。

3. 「對面個女仔幾靚呀可？」

正解︰「你再望過去就死梗！」

問得呢個問題，表示佢已經意識到你「Gup」女中。如果你答「Ok啦」、「普通過普通」等最為保守；如果想加分，記住要肯定你女友的地位；如果是女性朋友，就要視乎彼此的關係。

4.「你肚唔肚餓呀？」

正解︰「我好肚餓呀，不如一齊去食嘢？」

面對此問題，不少男生直覺回答︰「我唔餓呀。」於是成件事就錯晒。須知道，女人是奇怪的動物，明明是自己想要，但偏偏「就是開不了口讓你知道」。最好的應對方向是要來個秒殺反問︰「咁你呢？」

5. 「我唔鍾意收花」

正解︰「我都好想好想你會製造驚喜畀我。」

此名句出自女朋友口中為多，每逢情人節、週年紀念日、生日，其實都上演緊一場攻防戰，雖然表面上唔想收花，但如果閣下的表現唔達標的話，以後的日子就要加倍小心喇。

6.「唔緊要，你去啦！」

正解︰「其實我想你陪住我。」

「有個飯局我要去…」、「朋友話我知佢失戀…」男仔總有10萬個晚上不在的理由，雖然你會得到一句大方回應，但其實她心底裡是多麼的想你留下。如果真的要外出，最少也提供飯局內容等資訊，讓她放心。

7.「你無錯。」

正解︰「你認錯我就當無事發生過。」

正值鬧交時聽到此話，如果你仲對號入座心安理得對她說「我原諒你」，咁就祝你好運。其實誰對誰錯已不是重點，她說出這句話的意思無非就是希望你道個歉，解決件事。

8.「你係咪忙緊呀？」

正解︰「你究竟幾時先會搵我？」

這句同「你做緊咩呀？」如出一轍，問得就代表想知道你得唔得閒，如果答「我好忙唔得閒呀…」又係死路一條。忙還忙，最好承諾某段時間後再搵佢，否則愛得太遲，最心痛的可能是你啊！

9. 「是但啦，我無所謂呀。」

正解︰「你應該會估到我想點嘅。」

「無所謂」3隻字絕對會令人火起，因為無所謂之後換來是無限挑剔以及被拒絕的無言。此話背後的用意並唔是叫你畀意見，只是假裝很隨和，然後希望你可以猜到她的心思，如果中咗咁就100分啦。

10.「咁我走喇！」

正解︰「其實我仲見多你一陣。」

第一次講不為意，但此話出現第二、第三次時就要加倍留心，這大多是因為她對你依依不捨，卻又欲言又止找不到原因繼續對話。此時爽應「好呀！」、「下次見啦！」反使情況尷尬，更好的做法是氹下佢，同佢一齊計劃下次約會內容。

面對女仔的反話，作為直線思考生物的男仔在很大程度上會無晒符，但……

會說這10句話的女仔，不是為難你。我想，她只想你在乎佢。

全文刊於 CTgoodjobs
更多職場、筍工行情，即上CTgoodjobs