張晨：每個人內心的30%緩衝區

曾經有位好好嘅老闆同我講：

你有冇發現，你每次Set咗個Target，多數都做唔到100%，只係做到70%。

我嗰時心諗：

又好似係喎……

簡單講就係Present嗰時話營業額預想喺100蚊，現實出到嚟會係70蚊；覺得件事有5000千個觀眾，最後就會得到3500對眼睛。

而且我發現，其實唔止工作上，日常生活都係咁。你約人5pm等，大家都係5:20pm先齊人；你諗住份大學論文星期一做好，最後會拖到星期三朝早。

突然之間你覺得自己好冇用，原來所有嘅Target，全部都差少少，但又死唔晒，兩頭唔到岸。

▲ 相片來源：張晨("鳥"不起) facebook

正當我成塊面變成灰孩子嘅時候，老闆問我：「知唔知點解會咁？」我搖搖頭，心諗如果我咁醒我坐咗入房啦～你說對不對？

老闆解釋：

其實做成呢個情況好正常，每個人內心都有一個緩衝區，個數位多數就係30%。因為你知道Set100蚊我會Welcome，同時你最後做到70蚊我都會收貨。

所以嗰30蚊就屬於緩衝區，你會視情況去決定做唔做埋佢。而嗰70蚊係真正死線，因為你知道唔可以唔到呢個數。自己接受唔到，公司接受唔到。同你約人去街一樣，遲15分鐘OK，30分鐘就Feel Sorry。

聽落又幾有道理。老闆再問：「想唔想改下？」

呢啲Moment，老虎蟹都係點頭架啦。

佢話：

如果你真係想做到100蚊，應該Set Target係142蚊。不過唔係改Powerpoint嗰欄喎，係要改你心入面嗰欄。

永遠都係咁，如果你真心覺得『做到100蚊』，咁同老闆就應該講『做到70蚊』。你真係要做100蚊，心入面預測個數永遠大過100蚊先有機會。

 

因為我哋太多地方會走盞，現實同預測基本上就係差30%。

坦白講，你Set一個我高興，但現實做唔到嘅數字係冇意思。咁只係先甜後苦。

 

你個Present會輕鬆通過，但結果就不如人願。過多幾次，你喺我心目中就會係一個『70%嘅員工』，我對你都唔會有100%嘅期望。

佢呢句又令我諗返起一位前輩嘅訓話：「可以推遲嘅Deadline，就唔算係一個Deadline。」

社會大學，的確有排學。

原文刊於張晨（鳥不起）facebook，獲作者授權轉載。標題經TOPick 編輯修改，原題為《覺唔覺得做出嚟嘅嘢，往往比想像中差30%？》。