藍橘子：淨係窮遊先算識得去旅行？

香港人真係好鍾意去旅行，加上香港人一生都不羈放縱愛自由，所以幾乎九成人都會選擇自遊行。但自遊行或自駕遊已經唔足以令香港人喺面書炫耀。

近年最潮最值得晒命嘅…係去世界各地窮遊！

旅遊從來都係豐儉由人，你鍾意可以坐頭等住五星級，相反可以搭廉航住民宿。但唔知點解，有部分窮遊愛好者有一種「你唔係窮遊！根本唔係去旅行只係去洗錢咋嘛！」嘅錯誤觀念。

有次我去東京，同事問我洗咗幾多錢，我話差不多兩萬蚊。同事聽到之後，個死人樣就好似見住一個人將張中六合彩頭獎嘅飛用黎抿鼻涕咁Shocked…

嘩！你洗咁多錢去咗邊？

都係新宿、原宿、秋葉原、淺草囉，無乜特別…

我上次用咗幾千蚊，已經喺日本生存咗半個月！去晒東京大部分景點，同你去嘅地方幾乎一樣！你呢啲咪唔識去旅行囉！

呢位同事，每次其他人去完旅行，佢都會即刻衝過去問人用幾多錢，再分享佢用幾少錢生存到幾多日…其實網路上亦有好多以「窮遊」自豪，再話其他人唔識去旅行嘅人。

後來細問之下，原來佢住青年旅館，玩到邊住到邊，有時訓網吧，有時訓太空倉，每日三餐都食即食麵解決，沖涼就去公共澡堂。佢話見識到當地文化，仲結交咗好多有窮遊癖嘅朋友。

但點解我去旅行洗幾萬蚊就係唔識去旅行？咁我到底去咗乜？時光旅行啊？再者，你踩單車去到我去嘅地方，但我食嘅嘢你窮遊真係食得到？

講起用最少錢生存得最耐，我以前中學，每日都喺每個朋友嘅飯盒搶一啖飯食，捱過咗兩年，唔通我又指住食翠華嘅學生話佢唔識返學咩？！

其實窮遊嘅意思，係雖然你無錢，但都可以去啲有錢先去到嘅地方。方法係用時間換取金錢，例如步行或單車代替交通工具，住宿選擇離市區較遠嘅地方等等。

窮遊，只係一種去旅行嘅選擇，並唔係一個優勝之處。可能你的確認識到好多當地朋友，又可能體驗到當地文化…

但係…喂！我只係一個宅男，唔太想深切體會當地文化。喺香港，我每日都帶飯返公司食，平時又唔太洗錢。去到秋葉原呢塊聖地想洗多幾個錢，放縱吓自己豪食幾餐都得卦。

唔係個個去旅行都要做修行憎嘅。

另外有一類窮遊係最黑人憎。就係為咗慳錢，去破壞當地國家規矩。外國有好多景點或野生動物都會有Tour導賞團，除咗有專人講解導賞之外，主要目的係唔想遊客毀壞景點措施同破壞大自然生態。

有一次親身經歷，我去塔斯曼尼亞時有個野生小企鵝導賞團，可以遠距離觀賞夜晚成班小企鵝游上岸返回巢穴嘅過程。當時有班窮遊台灣人住同一間青年旅館，每個人聽見我話去睇小企鵝，都話：

不用給錢的！反正你也聽不懂他說什麼！他只給你遠距離看，但你自己爬過去就可以近距離拍照，還可以摸小企鵝，最重要是不用錢！！

我聽到時嬲到震，即場鬧爆佢哋。我嬲並唔係因為佢造我唔識聽英文（事實上我真係唔識），亦因為我唔識，特登事前上網做咗資料搜集，原來要求遊客遠距離導賞，係唔想嚇到班小企鵝，另外拍照唔可以開閃光燈，一般燈光會傷到小企鵝眼睛，所以導賞員只會用特製燈光，確保完全唔打擾到佢哋。皆因小企鵝一旦受到驚嚇，就會覺得呢個地方唔安全，佢哋就以後唔會再返黎！

最重要一點…小企鵝絕對絕對絕對唔可以摸！因小企鵝沾上人類氣味，族群就會排斥佢，離群嘅小企鵝根本無法生存。（我英文差有錯請指正，我鬧錯嘅話，對唔住囉！）

所以，請各位窮遊者做足資料搜集，唔好做其他國家眼中嘅蝗蟲。最後一句，正如我唔會歧視你哋去旅行唔捨得洗錢，請你哋都唔好覺得洗錢就係唔識去旅行。

全文刊於藍橘子 x 萬用上帝的facebook，獲授權轉載。