腦細!我去旅行唔代表我係廢青!

休閒 12:08 2015/10/06

分享:

相片來源:Pixabay

攞假篇

一般公司大假7-14日,係打工仔嘅基本福利,但無論你攞嘅假係有幾合情合理合法,都係要睇人面色,即使你喺普通日子攞假去旅行,唔係Peak Season或唔夠人手嘅時候,有啲腦細/上司都係唔太願意放你走。

佢地收咗假紙話OK,但口裡說得,身體卻很誠實,望黎望去遲遲唔簽名,其實諗緊點樣阻止你請假:

1. 唯獨你是不可取替mode 

吓你真係唔走得喎,搞唔掂喎,你走咗咁手頭上啲野點算?

(日日站著如嘍囉嘅你,無論平日喺公司係幾咁透明,只要到咗你攞假嘅一刻,即時升值十倍,公司前所未有咁需要你,你亦變得前所未有咁重要,冇人可以做到你做緊嘅野,彷彿你一行開,公司百年基業就會因為你而毀於一旦,關門大吉。)

2. 指摘廢青mode 

吓咁早攞定假?你係返工定掛住去旅行?

(早拎又話掛住旅行,遲拎又話做乜咁遲唔早啲通知,人手唔夠,調動唔切,又話忙又唔批,你咁樣我哋做細嘅好難做啫,點先為之唔遲唔早,不如你寫明喺員工守則?早啲講早啲訂機票/住宿,價錢會平啲嘛,仲可以多啲時間安排好工作同行程。)

3. 累死街坊mode

你走咗去旅行又要搵人跟你啲野,咁唯有將你嘅工作交俾XXX做啦。

(腦細,點解你係都要搞到我良心有愧,去旅行都去得唔安樂你先開心?有邊個又真係可以話走就走,我都想咁灑脫,但走前我要開幾多日Turbo,交帶好幾多野,返黎再跟返啲野,話就話放假,其實只係將放假嗰幾日嘅工作塞晒喺前前後後!我走咗嗰幾日,要同事幫下手在所難免,但唔好講到我係個不負責任嘅廢青。)

4. 討「假」還「假」mode

去少幾日得唔得呀?去泰國都玩唔到咁多日啦。

(你份糧出少幾千蚊得唔得?你都洗唔晒咁多錢啦。大假係我嘅,就算去邊都好,都只係想放鬆下,想點樣過,去幾耐,都係我嘅選擇。)

5. 分期付款mode 

吓請咁多日!?而家放住3日先,新年再放埋嗰2日,OK?

(腦細你地位超然,你話OK我實要OK架!不過3日時間去吓長洲過吓大海都仲得,再去遠少少就真係極級挑戰,仲攰過玩三項鐵人賽,來回起碼冇左1日,2日跑哂啲景點,攞盡佢晚機番黎第二朝仲要準時9點返到公司開會,面唔可以帶一點倦意,不如你去埋我嗰份啦!超然L!)

6. 開條件mode

 搞掂埋手頭上我俾你啲工作先,再講請假。

(好,不過真係搞掂就得先好,最怕你又屎忽痕諗到啲新野,沒完沒了,我永遠唔駛走。)

7. 問長問短mode

又去旅行?點解要去?去邊度?幾多人去?同邊個去?

(你知道咗又點?會批得爽啲?定想黎搵我?)

8. 出爾反爾mode

 (臨放假前……) 有個Project好趕,我諗你要跟一跟,假下次再放。

(遲唔黎早唔黎係要喺你放假先黎殺出個「國家任務」俾你,要你銷假。腦細你講就輕鬆,咁我俾咗嗰啲機票酒店錢……點計先……最緊要係準備咗個心情……唉……下次下次,下次大概可以……)

仲有就係,好多時腦細其實冇咩特別原因唔批你假,純粹覺得旅行=玩=唔重要,唔抵得你有得去放鬆,你走咗硬係會差咁啲野咁,但唔係話等你擔大旗去做啲咩,只係想hold起你「以備不時之需」。問題係,我始終要放大假,又唔俾帶落下一年,又唔俾放,咁啫係點先……

相片來源:Pixabay

旅行篇

當你成功攞到假去旅行,其實都唔係想像中咁輕鬆……

1. 冤鬼纏身mode 

WhatsApp,電話(如果打到) 從未間斷,佢地以為WI-FI就好似空氣一樣,去到邊都有,希望你隨時覆到佢地。

之前網上有個「一句撻著打工仔怒火大賽」裡面有句係「你收咗工做咩唔睇WhatsApp啊?」,而家多句「去旅行做咩唔睇WhatsApp啊?」

2. 假期任務mode 

試過放假前一日腦細走埋黎叫我放假嗰陣諗下黎緊個計劃有咩Idea﹕「諗下啦,搭飛機嗰陣諗下得㗎喇,唔會阻你時間,玩得開心啲啦!」

假期後又問返我諗成點,有咩Idea。佢覺得只要對腳唔係掂到公司塊地板,就唔係返緊工/做緊野。你唔好以為返到黎講兩句就可以敷衍佢,佢等緊你繼續講落去,你最好遞埋份詳盡Proposal俾佢過目,如果唔係又覺得你Hea佢又淪為廢青。

3. 監視mode 

去到邊?做緊咩?又留意你有冇打卡Post相,好似驚死你扮旅行呃佢咁,最好開住直播俾佢睇你做緊啲咩,佢就放心喇。

相片來源:Pixabay

返來篇

返到黎,都仲有說話聽……

1. 句句有骨mode 

嘆完世界拿?你就威啦/你就有錢啦/你就放得開心啦去遊埠,同事就忙餐死喇哈哈。

(其實大假就人人都有,你都可以請,係人都可以請,係人都可以去旅行,唔好懶係葡萄,講到得我有特權其他人冇咁。)

2. 問候寵茂虛假mode 

幾好嘛?好冇玩呀?開心嘛?有冇去XXX聽講好正!……(開場白甜過Sugarbaby) 丫係呢,你張Poster整成點?幾時交得俾我?(早啲入正題嘛)

3. 我為你犧牲你話我黐孖筋mode 

做咩唔玩多幾日先返黎呀?唔駛咁趕嘛!

(腦細你一係失憶一係精神分裂,好似係你叫我唔好去咁多日……)

相片來源:Pixabay

香港打工仔工時全球最長,每年2606小時,大假唔係多,有時想休息吓,但人去旅行我地去旅行,點解連攞個假都好似做錯事咁,要睇人面色俾人話,私人時間都期望你隨時Standby,真係病態社會。

問下自己,請一兩日假還好,再請多兩三日已經覺得自己好衰仔唔好意思遞假紙,一陣又俾人話係廢青,唔通真係要聽劉生講去少啲旅行睇少啲戱去買樓 (慳慳埋埋連凶宅都買唔起),過住屋奴人生先至係有為青年?先至係正常人?

辛苦一年等幾日假,晨早睇定下一年嘅請假攻略,等紅日連假去旅行,機票貴又多人,趕頭趕命跑行程,放假忙過返工,返黎仲要俾人串,香港人到底有冇Work-Life Balance?

其實香港人只係想要個Break,一個真正自由無壓力既Break!!

原文刊於SuperChaveller 超級查花飄遊記facebook,文章經作者授權轉載。

 

撰文 : 查花 Chary Lin