陳葒:投訴港鐵要寫英文?

City 11:21 2015/10/12

分享:

港鐵大圍站職員在上月禁止一名中學生攜帶古箏乘港鐵,引起爭議。(相片來源:大圍聯盟facebook)

那天在深水埗公園閒坐,裝修華走來叫我幫他寫信給港鐵。

「我強烈要求裝修佬可以帶梯搭港鐵。堂梯唔係貨物,係謀生工具,就好似 ……」

裝修強一時想不出適當比喻。「好似大提琴係大提琴手嘅謀生工具?」在旁看報的紮鐵輝幫口。

「無錯。」裝修華如釋重負。「輝哥嘅轉數真係快。」「唓,轉數快咪又係做紮鐵?」紮鐵輝苦笑。

「宜家鐵都無得我紮添呀!」「俾人炒魷?」傻強從破蓆上坐起。

「多得港鐵囉!」原來紮鐵輝昨天要送條鐵去地盤,卻因條鐵過長不能搭港鐵,結果遲到而被解僱。

「唔係人人負擔到的士嘅嘛!」紮鐵輝轉向我,「我都想你幫手寫信投訴港鐵唔識酌情處理。我哋遲到好甘㗎,就好似 ……」這次輪到紮鐵輝想不到貼切例子。

「好似女學生上古箏班遲到咁甘?」清潔萍邊掃地邊說。「酌情嘅嘢,我哋識乜!我頭先都俾港鐵攔住呀,話我嘅掃把過長喎!唔歡迎我哋清潔工人,平時又要我哋入去清潔,好矛盾呀!你幫手寫信反映吓啦!」

「嘥氣啦!」傻強伸了個懶腰。「掃把點及大提琴高雅呀!裝修佬無音樂家咁上等,紮鐵佬又無女學生咁惹人憐,邊個理你吖!以前你哋受過咁多阻攔,班離地中產、貼地本土,班音樂人、班教師,邊個幫你哋出過聲呀?」

「仲有啊,如果你真係寫信俾港鐵,」傻強不屑地看了我一眼。「記得用英文呀!」

全文刊於《經濟日報》收費閱讀,標題經TOPick 編輯修改,原題為「寫信給港鐵 」。

撰文 : 陳葒 補習社校長