藍橘子：有一種神獸叫女朋友

初初識我女朋友小豆，以為佢係一個正常人類女性，只係比起其他女仔可愛少少、靚少少同埋鍾意我多少少。

但識佢日子耐咗，我先發現原來佢係一隻神獸黎。我推斷，佢真身應該有八個頭，十六隻手腳，每隻手都有廿隻手指，條頸好似長頸鹿咁長，身體會無啦啦自燃或者流出腐蝕性液體，隻眼仲識得射死光添！

但點解我咁講呢？

話說有上佢屋企食飯，食完飯百無聊賴，實係睇吓童年相簿呢啲老套嘢。不過女朋友竟然話「不如睇吓我衣櫃執得幾整齊吖！」事後諗返起，或者佢見我平時份人老老實實，想暗示佢真正身分畀我知。

當佢一打開個衣櫃話：

睇吓我啲帽～

我一望就忍唔住嘩咗一聲。唔同季節、款式、顏色、材質嘅帽都一應俱全。

到底妳有幾多頭…咁多帽點戴得晒？

相比起，我只係有時唔想梳頭落街先會戴帽，所以得一頂。

咪講呢啲，呢度係專門放頸巾嫁！我啱啱已經將夏天嘅頸巾收埋咗，拎晒啲冬季頸巾出黎。

夏、夏天嘅頸巾？！我咁大個仔都係第一次聽。乜妳條頸好長咩？要戴咁多條……

不過事後我發現佢真係需要夏天頸巾，因為每次出入巴士、戲院，隻手仲凍過急凍雞翼。

咁要換款襯衫嘛。

然後佢又帶我參觀褸櫃、戒指櫃、襪櫃同鞋櫃，每次佢一打開櫃門，我就好似電影個主角去到鄰居屋企發現仍原來係特務黎，鄰居「嘟嘟嘟」撳幾個制，廚櫃、梳化、電視機就彈晒啲軍火出黎嚇到主角個心離一離。

參觀完軍火庫之後，我就確信佢係一隻有幾十隻手手腳腳嘅神獸。如果唔係咁，屋企嘅衣物係無可能着得晒！

佢經常都會同我講「唔夠衫着！」，所以佢身體應該識得自燃或者噴腐蝕性液體。仲有！佢隻眼一定識發射死光，先買咁多副眼鏡替換。

有一個神獸女朋友感覺係點？其實都幾忐忑，因為呢批軍火，係我買……

於是，我立即緊急嚴厲地對女朋友實行禁買令！不過道高一尺魔高一丈，唔夠一個星期佢已經諗到拆解辨法……

就係情侶裝！

自此之後佢每次買嘢，都會話：

不如我哋情侶裝吖～

我實在係抵受唔住同女朋友着情侶裝咁Sweet嘅誘惑！

所以，我而家由頭到腳連手繩都係同女朋友情侶裝。就連泳衣！佢都會買多條差唔多款式嘅游水褲畀我（注：唔係三角泳褲）。

其實我相信唔單止我一個人類擁有神獸女朋友，因為佢成日都安慰我話：

其實我唔算買得多嘢，其他人仲誇張啦！

雖然我唔知佢所指嘅其他人係邊啲其他人，同埋點解會係由佢黎安慰我……

不過咁！儘管小豆有三頭六臂十八隻爪，不過「心」只係得一個。

所以無論我打開邊一個衣櫃，都唔會有第二個男人出現，嘻嘻。

全文刊於藍橘子 x 萬用上帝的facebook，獲授權轉載。