莊偉忠：利人是利己的根基

前日星期四，寫咗篇《甜入心的平核柿》，全公司上上下下裏裏外外五千人，食緊日本和哥山平核柿嗰陣，我一個人靜靜地留喺辦公室，做緊另一件有意義嘅事，揸住支筆，簽署第五批、亦都係最後一批總共二百幾封信，通知合作夥伴縮短貨款數期，從今以後，唔理規模大細，數期唔可以長過X日，四年前開始嘅「互惠互利」行動，終於大功告成，我好驕傲，亦都好滿足。

商場搏奕，為求生存，各為其利，我好理解，其他人點做，唔關我事，無興趣知，亦都唔到我過問，我淨係希望照顧雙方利益，建立長遠合作關係，降低交易成本，減少對疊搏奕、你猜我疑、互相提防嘅無謂虛耗，盡可能做到公平交易。

將心比己，人哋供應貨物畀你，或者喺你嗰處寄賣，喺合理時間之內清繳貨款，避免影響對方頭寸周轉，天公地道，係諗都唔使諗嘅商業原則，同時以防萬一，廢埋同事手中嘅雞毛令箭，就算第時我鬆咗人，都唔可以財大氣粗，利用公司規模，大蝦細。咁樣嘅做法，究竟係聰明定係愚蠢，各師各法，人哋點講都得，我淨係知道，君子愛財，取之有道，呢個係我做人嘅原則，符合我嘅價值觀系統，心安理得，夜晩又瞓得。

互利雙贏唔應該得棚牙，講就天下無敵，做就無能為力。唔理人哋利益，明刀明槍攞人著數，唔好以為人哋儍嘅，唔識得靜雞雞諗計補償損失，暗中報復或者背後咒罵，最終肯定得不償失。

阿爸教落，做人同做生意嘅原則差唔多，絕對無得錯，你想人點對你，首先要識得點對人。

利人是利己的根基，只要肯行第一二三四五六七八步，先利人，後利己，就會慢慢發覺，身邊嘅好人原來一籮籮，好人圈子大啲，做人開心啲，成功嘅機會肯定高啲啲。

至於點解要分四年五批縮短數期，點解要下月喳喳臨執行，留點白，唔講穿喇，自己細心諗諗，一定明白。諗唔通，下星期日「齋問齋答慈善座談會」有人問嘅話，等我試吓解答；諗得通，就會明白，夠膽不按理出牌，反其道而行，放棄短期利益，換取長期回報，係幾咁有型有款㗎。

原文刊於莊偉忠facebook。